Emilía Þórný og Anna Soffía

Aðventan

2010-12-12T22:26:00.004+01:00

Stelpurnar eru komnar í mikið jólaskap - jólaandinn fór á eitthvert "æðra stig" í gær þegar ljóst var að Stekkjastaur myndi koma til byggða um nóttina. Emilía ákvað að freista þess að setja eitt "par" af skóm í gluggann, var mikið að spekúlera og ákvað að lokum að prófa. Hún uppskar þá bréf frá stekkjastaur - það var skemmtilegt og nú eru enn tveir skór í glugganum - rökstuðningurinn fyrir því er sá að þá myndi e.t.v. næsti jólasveinn "ruglast" og gefa í þá báða... haha. Annars er farið að örla á svolitlum efa hjá þeirri eldri en hún spurði mig alvarleg á svip í morgun þegar við biðum eftir að Hurðaskellir kæmi í viðtal á Rás 2 "mamma, eru jólasveinar í alvöru til?". Við þetta bætast svo endalausar spurningar um hvernig hann komist inn, hvar hann kaupi gjafirnar (æjæj), hver borgi fyrir þær, hvernig hann nái að fara til hennar og Magnúsar í Svíþjóð sömu nóttina, af hverju mamma og pabbi fái ekki í skóinn og svona má lengi telja.
Læt fylgja tvær myndir af stúlkunum sem voru teknar heima um síðustu helgi. Hari á heiðurinn af myndunum.

Systurnar

2009-12-03T22:44:00.002+01:00

Ein mynd af systrunum í Lofnarbrunni 4 frá því í nóvember. Það var gerð tilraun til jólakortamyndatöku en þessi eina "rétta" mynd lét standa á sér eitthvað.

Anna Soffía 1 árs

2009-03-15T23:04:00.005+01:00

Þá er nú orðið rúmt ár síðan hún Anna Soffía okkar kom í heiminn en hún varð 1. árs núna þann 5. mars. Ömmur og afar komu í heimsókn á afmælisdaginn og fékk sú stutta að blása á fyrsta afmæliskertið með dyggri aðstoð stóru systur.

Svo var haldin afmælisveisla fyrir vini og vandamenn á sunnudeginum eftir afmælið og var Anna Soffía mjög ánægð með veisluna sína og gjafirnar. Hún var mjög hissa yfir afmælissöngnum og naut þess til hins ýtrasta að vera miðpunktur athyglinnar. Hún þurfti smá aðstoð við að opna alla pakkana og þá voru nú margar smáar hendur tilbúnar til að aðstoða.

Fréttir af Önnu Soffíu

2008-08-29T12:53:00.004+02:00

Það er löngu kominn tími til að setja inn fréttir af Önnu Soffíu. Hún er nýlega farin að velta sér og tekur núna svona "veltisyrpur" þar sem hún veltir sér stanslaust. Hún er þó duglegri að velta sér af baki yfir á maga heldur en öfugt og stundum vill hún láta snúa sér við aftur yfir á bak svo hún geti velt sér enn einu sinni yfir á maga. Verst er að hún er orðin svo snögg að snúa sér og svo óþolinmóð að fá að snúa aftur að ekki nennir hún að vera lengi á maganum þegar hún er í þessum gír.
Skvísan er farin að fá graut og eitthvað mauk, en finnst samt mjólkin enn þá best og mig grunar að Óli verði bara að taka þetta fastara taki með matinn þegar ég verð ekki lengur heimavið en það styttist óðum í að ég fari að vinna aftur. Önnu Soffíu finnst mikið sport að sitja við borðið með okkur og sérstaklega gaman er þegar stóra systir matar, en það gerði hún í fyrsta skiptið í gær og gekk ótrúlega vel, enda svo vandvirk !
Svo las ég fyrir hana fyrstu bókina í dag (byrjaði eflaust á því fyrr með Emilíu), en það var hin sívinsæla "Unginn kvakar" sem Emilía fékk frá Rögnu og fjölsk. og hefur Emilía enn þá svolítið gaman af henni sjálf (sérstaklega þegar hún er mjög þreytt). Anna Soffía hafði bara gaman af lestrinum, enda lesið með mikilli innlifun :=) Það liggur við að viðkvæm, mjólkandi kona eins og ég tárist þegar enginn vill leika við gula ungann. Þetta er mikil átakasaga sem endar þó vel, mæli með þessari bók á hvert heimili!

Önnu Soffíu finnst annars skemmtilegast að:
- velta sér
- naga eitthvað gott dót (klæjar í góminn)
- "spjalla" við alla þá sem vilja spjalla við hana
- horfa á sig í spegli
- borða graut við borðið með fjölskyldunni
- kúra í rúminu hjá stóru systur
- frussa
- skrækja

Með stjörnur í augum...

2008-08-26T01:16:00.006+02:00

Emilía var eins og maður segir á útlensku “starstruck” á laugardag eftir Latabæjarhlaupið, en hún var svo nösk að sjá Íþróttaálfinn sjálfan álengdar í lok skemmtanahaldsins og heilsaði auðvitað upp á hann. Emilía sem aldrei hefur viljað koma nálægt jólasveinum eða öðrum búningaklæddum furðufuglum spjallaði við þennan landsþekkta orkubolta í bláa gallanum og hreyfði engum mótmælum þegar hann tók hana upp og dáðist af nýja verðlaunapeningnum. Við náðum því þessum fínu myndum af þeim saman en sú stutta hefur verið uppveðruð síðan yfir þessum merkilega fundi og segir öllum frá sem vilja heyra ! Allur Reykjavíkur maraþon og Menningarnætur dagurinn var annars hinn besti, að undanskildum nokkrum góðum skúrum. Dagurinn snérist að mestu um Latabæjarhlaupið enda mikið um dýrðir þar fyrir 3ja ára skvísu. Emilía hljóp sinn fyrsta Latabæjarhring og sagðist ætla að hlaupa annan “á morgun” áður en hún fór að sofa. Svo dreymdi hana eflaust Íþróttaálfinn, Sollu stirðu og Skoppu og Skrítlu. Eftir að hafa skilið að stelpur væru “sollur” og strákar “íþróttaálfar” eftir talsverð mótmæli um tíma, þá er hún núna á báðum áttum aftur og segist vilja vera íþróttaálfur. Þessi kynskipti heimur er stundum meira en lítið skrítinn fyrir lítið fólk.
Anna Soffía fylgdi systur sinni á þennan viðburð, en hélt sig í vagninum allan tímann, enda ekki út farandi í þessa rigningu og rok.... ;=)

Nýjar myndir

2008-05-27T01:24:00.001+02:00

Þá erum við búin að uppfæra myndasíðuna

Anna Soffía Ólafsdóttir

2008-04-07T00:45:00.003+02:00

"Litla systir" var skírð Anna Soffía ídag og nú er að venjast nýja nafninu og muna að nota það í stað allra hinna nafnanna sem hún hefur hlotið á meðan beðið var með að tilkynna hið eiginlega nafn. Hún hefur verið títtnefnd "litla systir", "litla", "lúllhildur" og "snúllhildur", en eins og Svíar segja "kärt barn har många namn" og það á svo sannarlega við hér.
Séra Ólafur Jóhannsson skírði stúlkuna hjá ömmu Dísu og var bæði skírn og veislan haldin þar. Skírnarvottar voru þær Sonja og Ingibjörg en þær bera nú ábyrgð á kristilegu uppeldi þeirra systra, Emilíu og Önnu Soffíu.
Emilía stóð sig með prýði, stóð alveg grafkyrr hjá okkur á meðan á skírninni stóð en tók þó fram eftir skírnina að hún hefði ekki sungið (alltaf jafnheiðarleg :=). Hún er alltaf ljúf og góð við litlu systur sína, segir "svona, svona litla systir, ekki gráta, ég er hjá þér" þegar hún grætur og ef hún heldur áfram að gráta er það endurtekið. Ef gráturinn er hávær, þá næstum kallar hún þetta, svo systirin heyri nú örugglega í sér. Um daginn sagði hún svo þegar Óli var að ganga um gólf með Önnu Soffíu grátandi: "Svona, svona litla systir, ekki gráta, þú ert hjá pabba, pabbi er skemmtilegur" :=)

Heima

2008-03-12T12:19:00.004+01:00

Þá er "litla systa" komin heim síðan á laugardag og hún hefur sýnt sama lundarfarið áfram eins og frá fæðingu en hún lætur fátt trufla svefn- og drykkjartíma, en af þeim tveimur er svefninn með vinninginn enn sem komið er. Það er því ekki óvanalegt að gestir fái ekki að sjá stúlkuna með opin augun því hún sefur sig einfaldlega í gegnum heilu heimsóknirnar þótt verið sé að halda á henni og færa á milli vöggu og skiptiborðs. Látum því fljóta með eina mynd af henni vakandi að virða fyrir sér kusu, en hún er greinilega athygliverð, enda með spena ;=)
Emilía stóra systir er ofsalega stolt af þeirri litlu og alveg sérlega góð við hana, vill auðvitað aðstoða við hin ýmsu verk og segir "allt í lagi litla systir" þegar hún grætur. Hún er einna helst spæld með að ég (Íris) geti ekki borið hana eins og venjulega en það kemur allt saman síðar. Á myndinni hér fyrir ofan er hún að sýna vinkonum sínum og nágrönnum, Rósu og Birnu, nýja fjölskyldumeðliminn en þær gáfu sér góðan tíma til að virða hana fyrir sér, sérstaklega Rósa sem var ofsalega áhugasöm um þetta litla kríli enda elst í hópnum.

Systrasvipur

2008-03-07T01:33:00.004+01:00

Spurning hvort það sé systrasvipur hér á ferð? Hér er mynd af Emilíu Þórnýju þegar hún var 1 dags gömul

Litla systir komin í heiminn

2008-03-06T00:13:00.002+01:00

Í dag klukkan 12:41 kom "litla systir" í heiminn, 3420 grömm og 50 cm. Hér eru nokkrar myndir af stúlkunni og aðstandendum.

Þorláksmessu stemmning

2008-03-04T23:09:00.006+01:00

Þessi mynd var tekin í gærkvöldi af þeim mæðgum, Írisi og "litlu systur". Sú stutta er reyndar eitthvað að fela sig á myndinni eins og glöggir lesendur taka eftir. Á morgun er svo komið að því og áætlað að krílið komi í heiminn um eða upp úr hádegi. Hér er hálfgerð Þorláksmessu stemmning þar sem mikil tilhlökkun og spenna er í loftinu.

Emilía fékk aðeins að prufa "stóru systur" taktana á lítilli frænku sinni henni Kolbrúnu Evu, í síðustu viku, og við látum hér fylgja með eina mynd af þeim fínu samskiptum sem þær áttu. Emilía var voðalega áhugasöm um Kolbrúnu litlu og minntist á það síðast í dag að hún vildi hitta hana aftur. Nú verður spennandi að sjá hvað henni mun finnast um litlu systur en hún er nú þegar búin að lýsa því yfir að hún ætli að "klappa litlu systur og ekki lemja hana" (foreldrunum til mikils léttis). Svo ætlar hún líka að kenna henni að segja ýmislegt, eins og mamma, pabbi, Emilía og neits og játs (já og nei, með nýjum tilbrigðum), fyrir utan það að kenna henni sænsku, að skríða og ganga o.s.frv.

Hverjum er svo Emilía líkust?

2007-11-09T23:02:00.001+01:00

Já halló !

2007-11-09T22:30:00.000+01:00

Hæ hæ
Hér eru svo komnar myndir frá árinu 2007 fyrir ættingja og vini nær og fjær.

Af okkur er allt gott að frétta. Emilía er nú að verða 2 1/2 árs í byrjun desember og orðin "stór og sterk" eins og hún segir frá. Henni finnst mjög gaman á leikskólanum, enda komin á Bangsaland með vinkonu sinni Guðnýju Eddu en þær hafa nú verið saman á leikskóla frá því þær voru 1 árs, eða frá haustinu 2006 á Lundi. Þær stöllur eiga svo báðar von á systkinum fljótlega, Emilía 7. mars og Guðný Edda 20. febrúar, þannig að það verður stutt á milli þeirra eins og systra þeirra.
Húsbyggingar ganga hægt og hljótt fyrir sig, Emilía hefur fengið úthlutað hornherbergi í Lofnarbrunni 4 og finnst alltaf jafn gaman að spóka sig í hálffokheldu húsinu. Litla systir verður svo hinu megin á ganginum þ.a. verður stutt að kíkja í heimsókn. Það er sama fyrirkomulag á Lofnarbrunni 2, eldri systirin með hornherbergið og sú yngri með hitt herbergið. Við höfðum hugsað okkur að flytja inn fyrir jól þegar verkið hófst en það verður ansi hrörleg vist og köld ef af verður.

//OLI

Komin með tíkó

2007-07-13T01:54:00.001+02:00

Halló !

2007-05-30T23:24:00.000+02:00

Emilía verður 2 ára á mánudaginn 4. júní og er stefnt að því að halda afmælið helgina á eftir með pompi og prakt í Álfheimunum. Manni finnst nú stutt síðan hún varð eins árs og ekki mikið lengra síðan hún fæddist. Af okkur er annars allt gott að frétta, húsbyggingar ganga vel eins og myndin sýnir hér fyrir neðan og sumarið er loksins komið.

Emilía Þórný er byrjuð á leikskólanum Austurborg sem er við Grensáskirkju/Hvassaleiti. Hún er búin að vera á leikskólanum í 2 vikur með aðlögun og líkar mjög vel. Hún er mikið úti að leika sér, Skoppa og Skrítla hafa komið í heimsókn auk þess sem þau fengu 4 hesta í heimsókn í dag. Einnig er Agnes frænka hennar leikskólakennari á Austurborg og Elín Rós stóra frænka er á elstu deildinni og hafa þær tekið vel á móti henni sem og allt starfsfólkið. Okkur líst mjög vel á þennan skóla, aðstaðan er góð sem og starfsfólk.

Það koma inn myndir fljótlega eftir afmælið hennar.

Kveðja
ÓLI

Í Stokkhólmi ég skemmti mér

2007-03-19T22:58:00.000+01:00

Við fjölskyldan fórum til Stokkhólms núna um daginn í heimsókn. Við gistum hjá Beggu, Ingó og Hilmi Viktor á Sandhamnsgatan og var mikil stemming hjá þeim litlu. Emilíu fannst náttúrulega alveg frábært að komast á "æskuslóðirnar" og sést hún hér í göngutúr um Gärdet á leið í brunch á Villa Källhagen. Ekki skemmdi fyrir að komast í dótið hans Hilmis Viktors og fá leikfélaga allan liðlangann daginn. Hún er annars orðin ansi ræðin þessa dagana og er farin að setja saman orð og mynda setningar og eru hér nokkur dæmi um orðsnilld stúlkunnar (takið eftir að þetta er ekki ritað skv. framburði)
"Emilía stríða ömmu" - Emilía hleypur um alla íbúð hjá ömmu sinni og lætur hana ekki ná sér.
"Emilía 1 árs, Mamma líka 1árs, Pabbi líka 1 árs" - Þegar við spyrjum Emilíu hversu gömul hún er.
"Kötturinn sat í glugganum, mamma sagði óóóóó" - Eitt kvöldið komum við heim og það var kominn köttur inn í þvottahúsið og hann sat í gluggakistunni.
Dúkkur eru að komast í mikið uppáhald hjá henni og finnst henni fátt skemmtilegra en að keyra dúkku um í vagni eins og í afmæli Natalíu Erlu frænku hennar í gær þar sem hún dundaði sér með dúkkuvagninn hennar nær allt afmælið. Í kvöld var svo Babyborn dúkkan böðuð 4 sinnum og þurrkuð vel og vandlega á eftir.

Three amigos

2007-03-19T22:41:00.000+01:00

Hér eru þær vinkonurnar þrjár í Lofnarbrunni, Rósa, Emilía Þórný og Birna. Myndin er tekin sama dag og fyrsta skóflustungan var tekin að parhúsinu við Lofnarbrunn 2-4 og vildi svo skemmtilega til að stelpurnar voru allar klæddar í alveg eins galla og verður eflaust svo í framtíðinni hjá Lofnargenginu !

Gleðilegt ár og nýjar myndir

2007-01-08T10:13:00.000+01:00

Þá er komið árið 2007 og við hæfi að óska gleðilegs árs og það með nýjum myndum á heimasíðunni okkar.

Síðustu tölur

2006-12-18T22:59:00.000+01:00

Emilía fór í 18 mánaða skoðun í dag og fékk "mycket väl godkännt" á öllum sviðum. Hún er orðin heil 11.7 kg að þyngd og 84.5 cm að lengd og hefur aðallega lengst frá síðustu skoðun enda vaxtarlagið aðeins búið að breytast. Hún fékk sprautu í bossann en kvartaði ekki neitt, fannst bara allt svo spennandi hjá lækninum að hún tók varla eftir sprautunni. Síðan fór hún í jólaklippinguna hjá honum Dóra á Langholtsveginum og er nú ætlunin að mynda þessa fínu klippingu á morgun og setja á bloggið.
Á miðvikudagskvöldið koma svo Ingibjörg og Magnús og eru þá flutt heim frá Danmörku. Örvar er að vinna fram á jóladagskvöld og kemur þá með síðasta flugi. Það verður stemming hérna um jólin hjá þeim frændsystkinum enda verður familían Jensen eitthvað hérna fram í janúar á meðan íbúðin þeirra er standsett.

Nei, nei, ekki um jólin

2006-12-16T12:14:00.000+01:00

Emilía Þórný er nú orðin 18 mánaða síðan í byrjun desember. Það vantaði akkúrat eina viku upp á 18 mánuðina þegar hún sleppti og fór að ganga. Núna er hún alveg hætt að skríða og hleypur um allt á stjörnuinniskónum sínum. Hún hefur verið ansi oft veik síðastliðnar vikur og mikið heima. Hún byrjaði á því að fá lungnabólgu, svo fylgdi einhver öndunarfærasýking í kjölfarið og loks var þetta búið að þróast út í astma. Hún er því að fá púst núna 3svar á dag og sem betur fer er hún bara voða sátt við að fá pústið, annars væri þetta nú ansi erfitt. Núna er hún heima og fer ekkert í leikskólann fyrr en eftir áramót. Nú á að ná þessu alveg úr henni....for good.
Annars er hún farin að hlusta á jólalögin núna og er þar uppáhaldslagið að sjálfsögðu "Nei, nei, ekki um jólin". Það er sungið með í viðlaginu :-)

Í fréttum er þetta helst....

2006-11-21T23:57:00.000+01:00

Emilía Þórný er nú að skríða í 18 mánuðina þann 4. desember, ég segi skríða því hún er ekki ennþá farin að ganga ein og óstudd nema að litlu marki. Hún tekur þó rispur fyrir okkur einstaka sinnum en kann samt best við sig skríðandi eða gangandi á hnjánum. Orðaforðinn er að stóraukast og koma nú ný orð á hverjum degi, t.d.
"Hadí" = Hafdís, uppáhaldsfóstran á Lundi.
"Kók" = Kókómjólk, sykurskert að sjálfsögðu
"Hjó" = Hjól

"Gúkka" = Dúkka
Emilía fékk lungabólgu í síðustu viku og var alveg heima. Hún er orðin ress aftur, smá hósti eftir en að öðru leyti góð. Það er víst algengara en maður heldur að börn fái lungabólgu. Í dag var svo fyrsti dagurinn á leikskólanum í 10 daga og var hún mjög ánægð með að komast aftur til krakkanna og "Hadí".

Gekk í gær

2006-10-24T00:25:00.000+02:00

Emilía Þórný gekk í fyrsta skipti ein og óstudd í gær. Hún var stödd í Útilíf í Kringlunni á hlaupabrautinni þar og ákvað að taka fyrstu skrefin. Hún tölti aðeins um og var bara stolt af sjálfri sér. Hún fór svo aftur að skríða og hefur ekki gengið aftur. Hún gengur kannski bara á sunnudögum?

16 mánaða

2006-10-04T23:02:00.000+02:00

Það hefur aldeilis dottið botninn úr blogginu okkar og er nú liðinn tæplega einn og hálfur mánuður síðan við blogguðum síðast. Það hefur nú margt gert á þessum tíma. Emilía Þórný er byrjuð á leikskólanum Lundi og hefur verið þar núna í mánuð. Þetta hefur gengið bara ágætlega hjá henni, hún grætur þó aðeins þegar við skiljum við hana á morgnana en samkvæmt fóstrunum þá er það mest kurteisisgrátur fyrir okkur foreldrana. Á leikskólanum eru 30 börn og flest á hennar aldri sem er mjög skemmtilegt fyrir hana. Hún á sjálfsögðu sína uppáhaldsfóstru sem að við vonum að sé mætt þegar við komum með Emilíu á morgnana, þá er viðskilnaðurinn auðveldari.
Emilía hefur ekki leyft foreldrum sínum að sofa mikið í september og vorum við alveg að gefast upp, hún vaknaði á hálftíma til klukkutíma fresti stundum og var reið og vildi ekki sofa. Við vissum ekkert hvað var í gangi með hana fyrr en á föstudaginn þegar Íris sótti hana á leikskólann. Þá kom í ljós að hún var látin sofa tvisvar á dag þar, það var víst venjan með nýju börnin þar. Þá fór þetta að skýrast með svefnleysið heima við, hún var hreinlega búin að sofa það mikið yfir daginn að hún var bara ekkert svo þreytt á kvöldin og næturnar. Þessu var snarlega breytt og stúlkan sefur eins og ljós núna, okkur til mikillar gleði.
Af helstu framförum Emilíu að segja þá er hún farin að tala meira, hermir eftir hundi, ketti, uglu, hesti og kú. Hún er þó ekki farin að ganga ennþá, hún ætlar að vera vel undirbúin fyrir það. Hún stendur þó alveg sjálf og er meira segja farin að standa uppi í rúmi hjá okkur að æfa jafnvægi á dýnunni. Hún tók 1/2 skref í gær á dýnunni en það telst nú kannski ekki með.

Strákarnir með stelpurnar

2006-08-22T15:10:00.000+02:00

Nú erum við tveir félagarnir í feðraorlofi með stelpurnar okkar. Maggi með Birnu sína sem er 3 vikum yngri en Emilía og svo við Emilía. Stelpurnar eru loksins farnar að sjá hvor aðra og leika sér saman, alla vega stundum. Í gær frömdu þær svo fyrsta sameiginlega prakkarastrikið sitt. Við Emilía fórum í heimsókn til Magga og Birnu í gærmorgun og við Maggi fórum aðeins að leita að bílum á Internetinu, svona eins og feður í feðraorlofi gera. Allt í einu tökum við eftir að það er orðið hljótt í íbúðinni. Það þýddi aðeins eitt, að stelpurnar voru að gera eitthvað sem þær máttu ekki gera. Við kíkjum fram og þær voru hvergi sjáanlegar. Eftir smá leit þá finnum við þær úti á svölum þar sem þær eru búnar að finna pakka með stórum krítum og tæta hann í sig og það var krít út um allt. Í fötum, andliti, höndum, hári, ofl. Það var þvílíkt stuð hjá þeim.
Nú fer feðraorlofinu senn að ljúka og aðeins þessi vika og sú næsta eftir. Þessir sex mánuðir hafa liðið ótrúlega hratt. Emilía byrjar svo á leikskólanum á mánudaginn 28. ágúst og er þá formlega orðin skólastelpa. Við vonumst til að hún fari nú fljótlega að ganga eftir það enda verða væntanlega margar fyrirmyndir á leikskólanum Lundi. Hún er nú farin að sleppa sér svona til að æfa jafnvægið en neitar alveg að ganga nema að það sé haldið í hendurnar á henni.
Emilía er orðin mjög dugleg að borða sjálf og er hérna smá myndasería af henni í hádegisham
Kv. Óli

Sumarmyndir

2006-08-08T23:37:00.000+02:00

Nú er verslunarmannahelgin liðin og þar með sumarið búið. Það er því við hæfi að setja upp nokkrar myndir frá "liðnu sumri" á myndasíðuna okkar :-) Þar eru myndir af aðallega Emilíu að skemmta sér í fríi í Svíþjóð, Danmörku og á ferð um Ísland. Það fer lítið fyrir fullorðnu fólki á myndunum og biðjumst við velvirðingar vegna þess en Emilía Þórný er einfaldlega svo yndislegt og fallegt myndefni, alla vega finnst okkur foreldrum hennar það.

Komin heim aftur

2006-07-17T18:25:00.000+02:00

Eftir 2 vikna "Tour Scandinavia" komum við Emilía Þórný heim til Íslands í gærdag ásamt Ingibjörgu og Magnúsi. Emilíu fannst æðislegt að koma heim til sín og hló og skríkti þegar hún kom í herbergið sitt. Þetta var frábært frí, sól og gott veður allan tímann. Emilía var orðin nokkuð þreytt í lokin enda vorum við á ferðinni alla daga. Í gærkvöldi var hún alveg búin um sexleytið og sofnaði upp úr hálfsjö og svaf alveg til að verða hálfsjö í morgun. Síðan á eftir að taka nokkra daga að koma henni í rútínuna sína aftur enda hefur verið erfitt að fylgja henni eftir "punkt og prick" í fríinu.
Ég mun fljótlega setja inn nýjar myndir úr ferðalaginu á myndasíðuna
//OLI

Í kóngsins Köben

2006-07-13T16:22:00.000+02:00

Við Emilía erum nú komin til Kaupmannahafnar eftir frábæra viku í Stokkhólmi. Við komum á mánudag með lest frá Sth. og verðum fram á sunnudag en þá förum við heim og verðum samferða Ingibjörgu og Magnúsi. Við erum búin að rölta heilmikið um "bæinn" og hefur veðrið ekki svikið okkur og er hér sól og 25 upp á hvern dag. Á þriðjudaginn fórum við í heimsókn til Rakelar, Jóa, Marinós Mána og Arnars Nóa og grilluðum með þeim. Í gær ætluðum við svo í dýragarðinn en Emilía fékk hita og vorum við því heima allan daginn. Emilía er komin með nýjan leikfélaga, Magnús frænda sinn, sem hún lítur mjög upp til enda er hann 2 árum eldri en hún.
//Óli

Í sól og sumaryl

2006-07-09T16:19:00.000+02:00

Smá heilsa frá okkur í Svíthjód. Vid höfum fengid frábaert vedur hérna í Stokkhólmi, sól og 30 stiga hiti upp á hvern einasta dag. Emilíu finnst alveg aedislega gaman, hún faer ad striplast um og busla baedi í vötnum og heima í gardi. Á morgun fer svo Íris heim en vid Emilía höldum áfram til Köben ad heimsaekja Ingbjörgu, Örvar og Magnús. Thad er spád áframhaldandi blídu út naestu viku. Jibbbííííí
Á myndinni er Emilía ad busla í litlu lauginni hennar Viktoríu, dóttur Unnar og Alexanders, í sumarhúsi vid Mälaren. Hitastigid rétt yfir 30 og thá er gott ad vera í skugga og kaela sig adeins...aaaaaaaaaaahhhhh.

Burri, burri burr

2006-06-29T00:20:00.000+02:00

Emilía Þórný er orðin ansi mikil bílamanneskja og segir burr, burr þegar hún sér bíla eða er að leika sér að þeim. Henni finnst mjög gaman að leika sér að brunabílnum sem að amma og afi gáfu henni og sést hér á myndinni. Hérna er hún að "kenna" Birnu vinkonu hvernig á að stjórna þessu tryllitæki. Skemmtilegast fannst henni þó þegar Birna sat á bílnum og hún ýtti og burraði.

Á mánudaginn er svo stefnan tekin á Svíþjóð í viku frí. Það verður æðislegt að koma "heim". Í framhaldi af því förum við Emilía áfram til Danmerkur til Ingibjargar og fjölskyldu og verðum þar í tæpa viku. Það verður gaman að þau Magnús fái að leika sér saman sem og fyrir okkur systikinin að hittast. Það verða nú einhverjar blogfærslur settar inn á ferðalaginu ef að tíminn leyfir :-)

//Óli

Hæ, hó, jibbíjei...

2006-06-21T00:25:00.000+02:00

Hæ, hó, jibbíjei og jibbíjei, það er kominn 17. júní. Myndin er tekin á Arnarhóli á 17. júní í kalsaveðri og rigningarúða, týpísku þjóðhátíðarveðri. Með okkur á myndinni eru vinir okkar Maggi, Drífa og dætur þeirra Rósa sem er 2 ára (að verða 3) og svo Birna sem verður eins árs á sunnudaginn. Emilíu fannst mjög gaman í bænum, nóg að fólki að skoða og spjalla við. Hápunktur stuðsins var þó helíum blaðran með fiskamyndinni sem hún fékk og var bundin við vagninn hennar. Það var ekki lítið fjör þegar hún hristi og faðmaði gripinn.
Emilía Þórný er annars komin með áttundu tönnina og eru þær nú orðnar jafnmargar í efri og neðri góm. Hún er farin að segja "kiþa" þegar hún sér kisu eða mynd af ketti, reyndar kallaði hún líka svona lítinn dverghund "kiþa" sem hún sá um daginn. Hún talar mikið sína eigin mállýsku (Emillísku) og er oft mikið niðri fyrir þegar hún vill koma sínum skoðunum á framfæri.

Nýjar myndir og tíðindaleysi

2006-06-13T16:05:00.000+02:00

Síðustu vikuna hefur rignt og rignt og svo rignt aðeins meira. Við Emilía höfum lítið getað verið á ferðinni þess vegna og erum maður nú orðinn ansi langeygur eftir sumrinu. Þetta getur verið ansi pirrandi fyrir þessa litlu félagsveru sem kann best við sig innan um fullt af fólki og á nýjum stöðum. Svo er bara sagt við mann, "það er ekkert til vont veður, það er bara að klæða sig betur". Það er ekki alveg að ganga upp þegar slagveðrið stendur inn í kerruna. Spáin fyrir vikuna er áframhaldandi rigning. Húrra :-) Við sjáum sumarfríið í Svíþjóð og Danmörku í hillingum enda eru 25+ gráður þar núna og sól. Vonandi að það haldist bara.
Emilía hefur nú lítið bætt við orðaforðann undanfarið enda er "hæ" nær því það eina sem hún segir. Hún er þó að reyna að herma meira eftir orðum hjá okkur en áður en þau hafa ekki náð að festa sig í sessi eins og hæið.
Svo eru komnar nýjar myndir frá eins árs afmælinu hennar

...og svo textinn með myndinni úr afmælinu

2006-06-05T12:23:00.000+02:00

Emilía Þórný á 1 árs afmæli ídag! Það var auðvitað haldin afmælisveisla í tilefni dagsins og var mikið líf og fjör í henni enda góður hópur af krökkum mættur á svæðið. Þegar ljóst var að allir kæmust aldrei fyrir í íbúðinni okkar var ákveðið að halda partýið uppi hjá Dísu ömmu. Mætt voru m.a. Rósa, Birna,Baldvin, Natalía, Kaja, Elín Rós, Gyða og Sigurður ásamt foreldrum þeirra, öðrum ættingjum og ömmum, afa og langömmu.Emilíu fannst svo gaman í afmælinu að hún vissi varla í hvorn fótinn hún ætti að stíga. Það sást til hennar á ganginum uppi þegar hún var að skríða á milli herbergja en snéri strax við til að missa ekki af fjörinu í hinu herberginu.Boðið var upp á íslenskar hnallþórur ásamt oblígatorísktri súkkulaðiköku skreytta smarties og einu kerti sem Emilía gerði tilrauntil að blása á, en mamma varð að koma til hjálpar. Hún fékk ekkert að gæða sér á neinum kökum enda svo spennt að húnmátti ekki einu sinni vera að því að borða kvöldmatinn.Afmælisgjafirnar voru margar og flottar og fékk hún fullt af fínu, nýju dóti, m.a. æðislegan síma á hjólum sem spilar ogrosalega flottan, rauðan brunabíl sem hún getur gengið með eða ýtt sér áfram á. Hún neitaði að skilja við brunabílinn þannig að viðurðum á endanum að fela hann þegar komið var að því að hátta og bursta tennur fyrir svefninn. Svo fékk hún líka mikið af fallegum fötum og æðisgengna, bleika, púmaskó frá Magnúsi frænda í Danmörku.Á myndinni sést hún á brunabílnum að hringja og segja "hæ, hæ!" í símann, en þannig vildi hún helst vera! Það er erfitt að trúa því að það sé ekki nema ár síðan litla "debban" okkar kom í heiminn, hún er orðin svo mikil manneskja sem spásserar um með vagninn sinn og segir "hæ!" hátt og snjallt, verður reið þegar hún fær ekki sínu framgengt, buslar í baðinu og tínir upp í sig cheerios og býður okkur líka.
Afmæliskveðjur frá afmælisprinsessu og foreldrum hennar!

Hún á afmæli í dag!

2006-06-05T00:04:00.000+02:00

Vinkonurnar í heimsókn

2006-05-22T15:17:00.000+02:00

Um daginn komu svo vinkonurnar í heimsókn og það var heilmikið fjör. Við strákarnir höfum allir eignast stelpur og bara stelpur. Hér má svo sjá hersinguna.
E.t.v. Margrét Hrönn Róbertsdóttir, janúar 2003; Rósa Bergmann, nóvember 2003
N.t.v. Birna Bergmann, júní 2005; Emilía Þórný Ólafsdóttir, júní 2005
Við Emilía erum nú lítið utandyra þessa dagana enda þvílíkt vetrarveður skollið á. 2 gráður, rok og svo einstaka snjókorn....og það er 22. maí í dag. Það er því mest leikið sér innandyra sem getur tekið dálítið á taugarnar hjá minni. Hún vill nú alltaf vera á ferð og flugi svo að þetta ástand er óviðunandi.
Emilía er búin að bæta við nokkrum nýjum orðum í orðaforðann sinn. Dada, Ekki og Hæ/Bæ komu í síðustu viku. Að sjálfsögðu er ég stoltur að hún sé farin að segja pabbi en hún kallar mig nú samt oft mömmu. Svo mætti halda að henni væri bannað mjög mikið þar sem "ekki, ekki, ekki,..." heyrist æ oftar, humhum.
Að lokum er svo búið að setja nýtt blundakerfi í gagnið. Hún var hætt að sýnast þreytt þegar hún átti að sofna í tveggja blunda kerfinu þ.a. hún sefur núna bara einu sinni á dag, svona frá hádegi til hálf-þrjú, þrjú. Þetta er að reynast ágætlega eftir þennan stutta reynslutíma sem er kominn, hún er orðin örþreytt á kvöldin klukkan átta og sofnar um leið og sefur til 7, hálf-átta sem er náttúrulega frábært.
//ÓLI

Trjákonan og nýjar myndir

2006-05-10T00:30:00.000+02:00

Þessi skemmtilega mynd var tekin úti á sunnudaginn og sýnist Emilía svífa yfir runnunum. Í raun er það nú hann faðir hennar sem er með hana á háhest :-)
Í dag var æðislegt veður með 19 gráðu hita og sól. Við Emilía Þórný fórum í langan göngutúr niður í Laugardal og hálfa leið niður í bæ með Magga og Birnu. Þær voru svo sannarlega í góðu stuði eins og feður þeirra. Á dögum sem þessum er yndislegt að vera í foreldraorlofi og geta verið úti og notið veðurblíðunnar.
Emilía Þórný kann vel við sig í nýja herberginu og sefur betur en nokkru sinni fyrr. Hún er farin að vinka bless og klappa lófunum svo að það heyrist. Hún er orðin ansi dugleg að ganga með fram og er fljót að koma sér á milli stóla, sófa og borða. Hún er líka farin að ganga með litla bláa vagninn sinn. Því miður er íbúðin okkar frekar lítil þ.a. það er ansi mikil vinna að vera snúa henni við þegar hún keyrir á hindranir en það er nú vel þess virði. Göngustíllinn er nú ennþá nokkuð stirðbusalegur (bannað að beygja hné) en henni fer fram með hverjum deginum.
Á myndasíðunni okkar eru nú nokkrar myndir frá janúar og fram í byrjun maí.
//Óli

Í dag er komið sumar

2006-04-28T13:05:00.000+02:00

Í morgun er búið að vera frábært veður hérna á íslenskan mælikvarða eða 10 gráður og sól meira að segja. Það er meira segja talað um að í dag verði hitametið slegið Við Emilía byrjuðum daginn að skreppa upp í bakarí og ætluðum að kaupa brauð fyrir endurnar blessaðar í Laugardalnum. Þessi íslensku bakarí eru alveg æði, við gátum fengið 7 kg. af brauði gefins ef við vildum. Þetta gerðist nú aldrei í Sverige enda eru dagsgömul brauð hátt verðlögð, eða á fullu verði fram á síðasta söludag. Við vorum nú bara hæversk og tókum 1/2 kg og töltum okkur svo niður í Laugardalinn og gáfum öndum, gæsum og dúfum brauð. Þeirri litlu fannst það sko gaman en hún varð að fá bita öðru hvoru eins og hinir fulgarnir. Núna sefur þessi elska og þá getur maður loksins sett í þvottavél og ryksugað sinnt sumarstörfunum eins og að þvo gluggana að utanverðu.
Því miður er engin mynd að þessu sinni, batteríið í myndavélinni fór í hleðslu í morgun og var ekki klárt annars hefði verið hér mynd af Emilíu með fuglunum.

Flutt og komin með eigið herbergi

2006-04-26T18:05:00.000+02:00

Emilía Þórný flutti nú um helgina úr Álfheimum 22 í Álfheima 22, sem sagt af efri hæðinni niður í kjallaríbúðina sem að ég er búinn að vera að gera í stand frá því í byrjun mars. Emilía er komin með eigið herbergi þar og svaf þar í fyrsta skipti núna frá sunnudegi til mánudags. Það gekk vonum framar, við Íris sáum fyrir okkur andvökunætur þar sem hlaupið væri fram og tilbaka milli herbergjanna okkar. Það varð ekki raunin þar sem að hún hefur sofið vel báðar næturnar þessi elska. Emilía stendur nú upp við borð og stóla og er farin að fikra sig á milli staða. Það líður eflaust ekki á löngu þar til að hún fari að sleppa sér og láti reyna gönguhæfnina. Hún er farin að taka aðeins meiri sénsa núna og dettur svona 2-3svar á dag núna með tilheyrandi gráti og gnístran tanna. En hún er fljót af á stað aftur. Eitthvað hefur verið kvartað undan myndaleysi á myndasíðunni hennar en það stendur allt til bóta. Ég set inn myndir mjööööög fljótlega :-D. Læt hér fylgja með eina frá því um páskana frá sumarbústaði ömmu og afa. Það mætti kalla þessa mynd "Unga stúlkan og útsýnið". Henni fannst alveg frábært að standa upp við gluggasylluna og horfa á útsýnið en aðallega voru það flugurnar sem að skemmtu henni.
//Óli

10 mánaða pæja

2006-04-08T18:28:00.000+02:00

Emilía er núna orðin 10 mánaða og er alger orkubolti sem vill alltaf vera annars staðar en hún er þá stundina. Hún er að sjálfsögðu komin með 4 tennur og fleiri eru á leiðinni, hún er farin að standa upp við hluti (m.a. í rúminu sínu), talar heilmikið á "Emilísku" en á mannamáli kann hún að segja mamma, afa, datt og takk (2 síðustu eru um það bil eins). Ég reyni þó að kenna henni að segja pabbi en það kemur bara mamma út. Hún er mjög músíkölsk stelpan og hefur gaman af því að hlusta á músík, hvort sem það sé í útvarpinu eða við foreldrarnir sem að spila á píanó, gítar eða munnhörpu. Hún situr þá og dillar sér í takt við músíkina. Auðvitað spilar hún síðan sjálf á píanóið og gítarinn en hefur ekki náð tökum á munnhörpunni ennþá
Annars í öðrum fréttum þá erum við búin að vera í 1 og 1/2 mánuð á Íslandi og geri aðrir betur. Íbúðin okkar í kjallaranum er alveg að verða tilbúin til innflutnings, bara eftir að leggja parket á eldhús, setja borðplötu, baðskáp,....öhhhhh...það eru nú þó nokkur smáatriði eftir en við stefnum á að flytja helgina eftir páska.

Áskorun svarað

2006-04-07T22:23:00.000+02:00

Begga skoraði á mig og ég gat nú ekki skorast undan...
Fjögur störf sem ég hef unnið um ævina

1. Landmælingar. Ég vann sem ökumaður fyrir þýska landmælingamenn í GPS mælingum sumrin 1993 og 1995. Það var æðislegt fyrir tæplega 20 ára gamall gutta að fá að keyra stóran jeppa yfir Sprengisandi og Kjöl og að fá þessað auki borgað fyrir það. Ekki skemmdi heldur að maður fékk að spreyta sig á þýskunni á meðan, hehe.
2. Smiðjan hjá Ístak. Vann við það í eitt sumar að setja upp vélbúnað í skólphreinsistöðinni niðri á Granda áður en hún var tekin í notkun sem betur fer. Vann með ítölskum kana, Alesandro eða Sandro að nafni, og við vorum lægst settir af öllum og vorum settir í að mála drullupumpurnar á botninum í skítakarinu, skríða í ræsunum og hreinsa suður o.s.frv. Algert skítadjobb en kaninn var skemmtilegur.
3. Trillukarl hjá Vöruflutningamiðstöðinni í 2 sumur. Mitt hlutverk var að taka á móti vörum og setja á “trilluna” mína og skutla því í básinn hjá Gvendi á Hólmavík og fleiri góðum. Þarna voru litríkir karakterar, sérstaklega hann Snorri sem átti það til að garga á viðskiptavinina til að stuða þá og Steini gamli sem að lyktaði svo hrikalega illa að forstjórinn sendi hann heim í bað alla vega á 2 vikna fresti.
4. Verkfræðingur hjá OZ í Stokkhólmi. Þegar við Íris fluttum út til Stokkhólms fékk ég vinnu hjá OZ sem hafði nýopnað skrifstofu á Drottninggatan. Skrifstofurnar voru á fáranlega góðum stað við aðalgötuna í Sth., innréttingarnar voru italian design (við sátum með skjáina í fanginu þar sem borðin voru svo grunn en þau voru flott) og það var partí 4. hvern föstudag þar sem við fórum út í Systembolaget með kerru og fylltum af bjór og kláruðum svo. Þetta var æðislegur tími en við seldum að sjálfsögðu ekki neitt.

Fjórar kvikmyndir sem ég get horft á aftur og aftur.
1. Terminator. Orginallinn er alveg frábær og Arnold er flottur... I’ll be back
2. Back to the Future trilógían. Það er eitthvað við þessa seríu sem að heillar.
3. Með allt á hreinu. Maður er alltaf að fatta einhverja nýja brandara í þessari snilldarmynd
4. Liverpool, the road to glory 2005. Já, það er endalaust hægt að horfa á Liverpool verða Evrópumeistara

Fjórir staðir sem ég hef búið á.
1. Dragavegur 4. Man ekkert eftir að hafa búið hérna en það var líklega fjör. Ég var bara 2 ½ þegar ég flutti héðan. Keyri þó stundum framhjá og þykist muna eitthvað. Ég held þó að þetta sé þykjustu minningar, þvingaðar fram af ljósmyndum af mér í brúnum og gulum fötum.
2. Álfheimar 22. Frá 1977 til 1999 bjó ég í Álfheimum 22 og svo aftur núna frá 2006 og líklega fram á haustið 2007. Þetta var stórt heimili, við systkinin með mömmu og pabba og svo Villi fósturbróður mínum á efri hæðunum tveimur og svo amma og ömmusystir í kjallaranum. Ég var yngstur, fæddur 1975 en Ella ömmusystir var elst, fædd 1895. Það var gott veganesti að alast upp í þessu litla samfélagi. Svo bjó auðvitað Maggi stórvinur á númer 18.
3. Erik Sandbergsgatan, Solna. Fyrsta heimili okkar Írisar. Við máluðum í hræðilegum litum og vorum mest megnis með lánuð húsgögn en við höfðum það mjög gott þarna.
4. Råstensgatan 13, Sundbyberg. Æðislega íbúðin okkar í Svíþjóð. Hvað er notalegra en að sitja við arininn á köldum vetrardegi með glögg og lussebullar.

Fjórir staðir sem ég hef heimsótt í fríum.
1. Portúgal. Brúðkaupsferðin með Írisi árið 2001. Allt var planerað fyrirfram af ferðskrifstofunni, við fengum meira að segja kort af Portúgal þar sem búið var að tússa inn aksturleið með öllum gististöðunum. Við keyrðum frá norðri til suðurs og gistum á víngörðum. Maturinn var æðislegur, Calamaries í hvert mál fyrir mig.
2. Benidorm. Þriggja vikna djammferð með vinunum. Þessa ferð hefði mátt stytta um svona 2 vikur, Benidorm er mesta skítapleis sem ég hef komið á ævinni. Það var ógeðslega heitt, það fengu allir í magann og Maggi stórvinur endaði inni á spítala með næringu í æð og kom heim næpuhvítur og 10 kg léttari og var ekki samur fyrr en mörgum mánuðum síðar.
3. Helsinki. Ég hef farið ótal sinnum til Helsinki og alltaf með Silja Line. Ferðafélagarnir hafa verið mismunandi en ég held að Reynir hafi oftast verið með. Það er eiginlega alltaf miklu skemmtilegra á leiðnni þaðan og þangað heldur en í sjálfri borginni.
4. Val d’Isere. 1 viku skíðaferð með æskuvinunum ásamt konunum okkar til Val d’Isere árið sem við urðum þrítugir. Við leigum okkur æðislegan skála og fengum fullkomið veður allan tímann. Stjáni stal showinu sem “Axel í gær” og með Rammstein atriðinu.

Fjórar síður sem ég skoða daglega.
1. www.mbl.is
2. http://www.liverpool.is/
3. http://www.soccernet.com/
4. http://www.google.is/

Fjórar bækur sem ég les oft.
Ég get ekki sagt að ég lesi bækur oft. Það er nú bara þannig að ég les þær einu sinni og síðan tekur næsta við

Fjórir staðir sem ég vildi vera á núna.
1. Á heitum og sólríkum stað með stelpunum mínum
2. Í Svíþjóð í húsinu sem að við næstum því keyptum í Kallhäll
3. Á Anfield í Liverpool með Magga
4. Á toppnum

Fjórir sem ég skora á að gera þetta.
1. Íris
2. Guðrún
3. Maggi og/eða Drífa
4. Tobbalingurinn minn

Óli

Komin til Íslands

2006-03-19T22:14:00.000+01:00

Nú er öll fjölskyldan komin til Íslands. Við búum heima hjá Dísu ömmu í Álfheimunum. Íris er byrjuð að vinna og líkar bara vel, ég er að standsetja kjallaraíbúðina í Álfheimunum ásamt Jonna þúsundþjalasmið og svo er Dísa amma að passa Emilíu Þórnýju á daginn. Ég geri mér vonir um að vera búinn að koma íbúðinni í íbúðarhæft ástand fyrir páska en það er þó langt í land. Ég er búinn að henda út 300 kg af eldhúsinnréttingu og milliveggjum, 400 kg af múrbroti og annað eins af ryki er búið að falla til. Íbúðin verður þvílíkt flott þegar þetta verður búið og fær Emilía þá sitt eigið herbergi. Hún ku vera mjög spennt yfir því. Annars er Emilía komin með 4 tennur, 2 í efri og 2 í neðri, sem hún lætur óspart skína í þegar hún brosir. Hún hlær mikið og brosir og finnst skemmtilegast þegar margir koma í heimsókn og það er nógu mikið fjör. Hún er farin að taka mikinn þátt í öllu sem gerist, dregur sig eftir gólfinu þangað sem hún vill fara, gerir sig líklega til að fara að skríða (nær en nokkru sinni) og er farin að segja "datt" þegar hún hendir hlutum í gólfið sem er mikið sport. Ég bíð í óþreyju eftir að íbúðin verði klár svo ég geti byrjað í "alvöru" foreldraleyfi :-)
Bæjó
Óli

búðarráp og lattesörpl

2006-02-18T18:05:00.000+01:00

Öll vikan hefur farið í lítil kveðjuhóf með vinum hér í Stockhólmi og á fimmtudaginn var komið að síðasta degi þeirra Emilíu og Hilmis (öðrum nöfnum Frú Barbarú og Herra Strumpur) saman og þar með okkar Beggu líka. Dagurinn var vel nýttur í búðarráp í Faltöversten sem endaði svo á kaffihúsi. Litlu krílin skemmtu sér vel við að teygja sig í hvort annað og spjalla saman, með óvenjumikla þolinmæði í þessum leiðangri. Fyrir vikið náði ég að versla nokkrar fínar H&M flíkur á Emilíu sem passa væntanlega í sumar/haust. Get ekki neitað því að ég er komin með smá kveðju panikk, svona á síðustu stundu og finnst eins og ég hljóti að vera að gleyma einhverju hér í Svíþjóð en get ekki fundið út hvað það er.....

Búin að pakka!

2006-02-15T21:13:00.000+01:00

Emilía er hér búin að pakka sjálfri sér í kassa með lopapeysunni o.fl. En ætli hún fái nú ekki að fara í flugið með mömmu, það gæti verið erfitt að ná henni úr tollinum, hún er jú "made in Sweden". Elskan okkar var í svo kölluðu BOEL testi hjá hjúkkunni á barnavardscentralen um daginn og reyndist hún vera með leiftursnöggt viðbragð og fína heyrn. Svo var hún mæld 9.7kg og 74cm.
Hún fékk svo í fyrsta skiptið heimagerða máltíð ídag í staðinn fyrir Hipp dósamatinn. Þá varð tagliatelle með rjómabættri tómat og aubergine sósu fyrir valinu og borðaði hún það með bestu lyst mömmu til mikillar ánægju.

8 mánaða og fjör færist í leikinn

2006-02-04T15:55:00.000+01:00

Emilía Þórný er 8 mánaða í dag og ekkert ungabarn lengur. Hún er orðin talsvert fimari í höndunum og getur því leikið sér meira sjálf. Stundum væri gaman að vita hvað hún væri að hugsa! Henni finnst voðalega gaman þegar er líf og fjör, sjarmar fólk í kringum sig með því að horfa beint í augun á fólki og brosa sínu breiðasta, þetta er stundum dálítið óþægilegt þegar maður situr í Tunnelbananum, eða í biðröð einhvers staðar og kærir sig ekki um að fara að tala við ókunnuga. Hins vegar kemur það sér ágætlega á kaffihúsum og í búðum, það er ekkert sjaldgæft að allar afgreiðslustúlkurnar séu komnar til hennar að tala við hana.

Þetta finnst henni gaman:

Að leika sér að tágkörfu sem við eigum, hún er stór og spennandi
Dagblöð, tímarit og bækur
Fjarstýringar og lyklaborð
Stórar hrærur, sleikjur og annað dót úr eldhúsinu
Verkfærakassinn sinn, sem hún klemmur sig stundum á, þá er ekki jafngaman
Feluleikur
Að standa upp við eitthvað (þarf samt að passa hana vel)
Drekka úr málinu sínu
Borða mat með bitum í, þá reynir hún að tyggja eins og hún væri með tennur
Borða brauðsneið eða naga skorpu
Láta lesa fyrir sig upp úr "Unginn Kvakar" og "Boken om garden"
frussa
og margt, margt fleira...

Emilía er ekki komin með neinar tennur og er hún því ein eftir í foreldragrúppunni sem er ekki komin með tönn. Hún er ekki farin að skríða en dregur sig áfram á maganum. Talar mikið og segir: dadadada, mamamam, gagagaga, papapapa og aðra varianta af þessum hljóðum. Og svo er hún farin að reyna að klappa saman höndunum.

Fyrsti Kossinn

2006-01-23T21:17:00.000+01:00

Í gærkvöldi var ég eins og alltaf að knúsa Emilíu og kyssti hana á kinnina og viti menn, haldið þið ekki að hún hafi gert það sama við mig. Ég var náttúrulega ekki lengi að endurgjalda kossinn og þá kyssti hún mig á kinnina aftur og þetta endurtók hún svo nokkrum sinnum! Mér hefur nú ekki tekist að fá hana til að gera þetta í dag, en ég hlakka til að fá næsta koss, þótt þeir séu dáldið blautir :=)

Foreldragrúppa

2006-01-19T22:18:00.000+01:00

Stelpurnar úr foreldragrúppunni og krílin þeirra komu hingað í kaffi í vikunni. Þessir fundir fara að verða fjörugri og fjörugri. Fyrstu skiptin sem við hittumst gátum við setið allar við borðið og drukkið kaffi og borðað kökur á meðan börnin lágu á bakinu á gólfinu og góndu upp í loft og virtu umhverfið fyrir sér. Í þetta sinn var allt annað uppi á teningnum og við Emilía voru gjörsamlega útkeyrðar þegar allir voru farnir. Það er mikið fjör þegar 6 mömmur og jafnmörg 7 mánaða kríli koma saman til að "fika" eins og maður kallar það að koma saman, drekka kaffi, borða kökur og spjalla hér í Svíþjóð (mjög fínt orð, verð að íslenska það við tækifæri).
Núna fer að sjást verulegur munur á hreyfiþroska barnanna. Vincent, sem er stærstur í hópnum, er sá brattasti, skríður út um allt, sest upp og stendur upp við hluti, gengur með og sleppur meira að segja báðum höndum og vill bara ganga út á mitt gólf, dettur þá auðvitað á hausinn og fer að gráta, já, heimurinn er harkalegur en hann gefst ekki upp! Því má bæta við að mamma hans, Susanne, er ekkert mjög hrifin af þessu, enda gerir hún ekkert annað en elltast við hann og hugga dagana í enda. Tveir í viðbót eru farnir að skríða, þeir Theo og Douglas, svo eru það Lukas og Emilía sem sitja stöðug, eru aðeins varfærnari en frekar fúl yfir því að komast ekki áfram eins vel og hin og að lokum Rebekka sem er sú rólegasta í hópnum, nýfarin að vellta sér, er að æfa sig í að sitja en er að öðru leyti mjög róleg. Spannið er sem sagt breitt og allt þykir þetta "eðlilegt"!
Þrátt fyrir að hópurinn var hér í heila 4klst, þá náðum við ekki mikið að tala saman, því var ákveðið að fara barnlausar út í kvöld!
Á myndinni hér fyrir ofan eru þau Theo og Emilía fremst og Rebekka og Lukas fyrir aftan.

Við erum búin að leggja inn myndir frá Egyptalandi á heimasíðuna.

"Kann sjálf"

2006-01-11T12:07:00.000+01:00

Eða öllu heldur "vil sjálf". Emilía er farin að taka um skeiðina þegar maður er að mata hana og vill sem sagt borða sjálf, mér finnst þetta frekar snemmt og mjöög kámugt!! Verð að skaffa blautbúning fyrir bæði hana og mig. Matartíminn sem sagt orðinn viðburðarmeiri og tekur lengri og lengri tíma, bæði vegna þess að Emilía teygir sig eftir skeiðinni, vill skoða innihaldið í smekknum (sem ég loka helst augunum fyrir, bläää!), vill lyfta smekknum svo hann sé fyrir andlitinu og reynir að tyggja þessa litlu bita sem eru í barnamatnum eða vandar sig við að spýta hverjum einasta bita út úr sér....

Úr sand í snjó

2006-01-08T18:11:00.000+01:00

Í eyðimörkinni einn daginn og vetrarríki þann næsta. Emilía fékk snjóþotu í jólagjöf frá okkur Óla og hún var prufukeyrð í gær í brekku á Gärdet. Hún fílaði þetta vel, sérstaklega þegar hún var komin á góða ferð, þá baðaði hún út öllum öngum af spenningi!

Sól, sól skín á mig!

2006-01-06T23:03:00.000+01:00

Þá eru þessar tvær vikur í sólinni liðnar og við komin heim í algjört vetrarríki. Miklar andstæður fyrir Emilíu að taka inn á einum degi og hún skildi örugglega ekkert í neinu þegar við fórum úr 27 stiga hita og sól í Sharm el Sheik, yfir í -15 gráður og snjó í Stockhólmi. Hefði örugglega orðið eftir í Egyptalandi hefði hún mátt velja. Fannst sólin, sjórinn og sundlaugin algjört æði og hló af kæti þegar hún sá glampandi vattnið og leikandi öldurnar. Svo var heldur ekki amalegt að hafa fullt af fólki í kringum sig til að spjalla við alla daga, og ef ættingjarnir brugðust þá var alltaf einhver myndarlegur Egypti tilbúinn að gantast aðeins með mann. Emilía Þórný lærði snemma að Egyptarnir væri skemmtilegir kallar og fylgdist frekar spennt með þeim, heldur en mömmu og pabba.
Ferðin var í alla staði frábær, í Egyptalandi er margt að skoða og þarf manni ekkert að láta sér leiðast, við náðum að skoða heilmikið, en langar samt aftur til að sjá enn meira. Kórallrifin eru heil draumaveröld út af fyrir sig, eins og að synda í fiskabúri með risastórum gullfiskum í öllum regnbogans litum.
Annars er það helst í fréttum að Emilía fékk skap 28. des. þegar hún skyndilega sýndi að henni líkar ekki þegar hlutir eru teknir af henni sem hún er að leika við. Aldrei áður hafði hún sýnt að henni væri sama, en þarna skyndilega fór hún að háorga ef eitthvað var tekið af henni, og hún hefur haldið því áfram síðan. Nú fer kanski að reyna eitthvað á mann. Spurning hvaða uppeldisaðferð skal velja...

Ég fer í fríið, ég fer..

2005-12-19T22:33:00.000+01:00

Á morgun förum við til Sharm el Sheik í Egyptaland og verðum þar yfir jól og áramót ásamt foreldrum okkar, systrum og barni (Mamú ... eða Magnús). Það verður gaman að eyða jólunum í sól og sumri og fjarri ölli stressi. Í kvöld erum við búin að pakka niður ógrynni af farangri þar sem Emilíu föt og ýmsir fylgihlutir eru rúmlega helmingur. Þó hefur slæðst niður ein og ein flík á foreldrana sem og forláta "snorkl"græjur sem Íris segist ekki geta lifað án. Emilía er orðin mjög spennt fyrir ferðinni og hefur verið að máta sumarfötin sín undanfarna daga og sést hér að ofan með einn af mörgum sólhöttum sínum. Hún er aldeilis flott á því daman.

Við óskum ykkur öllum gleðilegra jóla og góðs nýs árs 2006. Við sendum sólarkveðjur frá Egyptlandi. Sjáumst á næsta ári.

Óli, Íris og Emilía Þórný

Santa Lucia

2005-12-13T22:30:00.000+01:00

Í dag er haldið upp á dag hinnar heilögu Luciu hér í Svíþjóð og Emilía fór því á sína fyrstu tónleika sem haldnir voru með "luciatåg" og öllu tilheyrandi í Sundbybergs kyrka í kvöld. Hún var voðalega góð, reyndi að raula aðeins með í n0kkrum lögum enda vön að fá að syngja með heima hjá sér. Annars má nefna að það er nákvæmlega ár síðan við fórum í sónar og fengum að sjá hana í mallanum, það var einmitt á Luciunni 2004, og við gleymum því aldrei. Ótrúlegt að það sé bara ár síðan og hún orðin svona stór, farin að hanga í stólsfótum, syngja, frussa m.m.

Emilía og Ingibjörg

2005-12-04T10:13:00.000+01:00

Emilía Þórný og Ingibjörg eru orðnir mestu mátar eins og sést hér að ofan. Emilíu finnst gaman að leika "rífa og tæta" um þessar mundir og sama hvað um er að ræða. Að taka í hárið á Ingibjörgu er ansi vinsælt og í gær fékk laugardags "mogginn" að kenna á því og var ólesanlegur eftir það. Ég er nú viss um að það hefði nú ekki verið vinsælt ef ég hefði gert það sama þegar ég var smápolli enda var moggalestur á laugardagskvöldum heilög stund hjá Magga afa.
Í dag er Emilía orðin 6 mánaða gömul og heldur upp á daginn með að heilsa upp á vini og vandamenn á Íslandi en þær Íris eru á leið þangað í dag í vikuheimsókn. Það er ótrúlegt til þess að hugsa að það séu liðnir 6 mánuðir frá því að hún kom í heiminn þessi elska. Tíminn hefur liðið svo hratt og hún hefur þroskast mikið á þessum tíma. Upp á síðkastið virðist sem að þroskahraðinn hafi aukist. Maður sér mun á henni milli þess sem maður fer í vinnuna að morgni og kemur heim að kvöldi. Þá er hún búin að finna upp á einhverju nýju hljóði, farin að sitja eða uppgötva eitthvern merkilegan hlut sem hún sá ekki áður. Ég bíð spenntur eftir að fá að byrja á mínu feðraorlofi núna í mars og fá að eyða 6 mánuðum með Emilíu Þórnýju í fókus.
PS: Við erum búin að uppfæra myndasíðuna loksins. Væntanlegt eru svo skírnarmyndir og sumar á Íslandi

Jólahvað??

2005-11-30T21:45:00.000+01:00

Fyrsti aðventusunnudagurinn kominn og farinn og jólin nálgast óðum. Emilía lét sér fátt um finnast, en fannst mosinn á kertastjakanum mjög spennandi. Hún teygir sig eftir öllu þessa dagana, vill koma við allt og helst borða það! Hún er greinilega mikil bjartsýnismanneskja því hún reynir að ná í allt, jafnvel þótt það sé langt út fyrir hennar "armlengd", en hún er nú ekki mikil sem betur fer. Verður svo ægilega pirruð þegar hún nær ekki.

Annað sem henni finnst gaman að gera er:
Sitja sjálf
Horfa út um gluggann
"Fljúga"
Skoða smekkinn sinn sem er rauður og flottur
Borða hárið á dúkkunni sinni
Segja bababa, dadada, blablabla
Grúfa höfðinu í teppið, eða í peysuna á þeim sem heldur á henni og tala
Sitja í stólnum sínum og borða með okkur Óla
Hlusta á "heyrðu snöggvast snati minn" (mamma syngur)
Æfa sig í að setja snuðið sjálf upp í sig (orðin ansi lunkin)
Sitja í vagninum og horfa á trén og húsin, fólkið og bílana

Henni finnst hins vegar ekki gaman að:
Sofa þegar hún er ekki þreytt
Láta klæða sig í útigalla og flís innandyra
Vera með vettlinga
Geta ekki skriðið
Sitja kyrr á kaffihúsi og mega ekki einu sinni halda á kaffibolla

Amma Dísa í heimsókn

2005-11-28T23:36:00.000+01:00

Dísa var í heimsókn í nokkra daga og núna vorum við svo heppin að Emilía er orðin nógu dugleg að borða mat og drekka vatn þannig að hún getur farið í pössun. Við notuðum því tækifærið og skildum Emilíu eftir heima með ömmu Dísu á laugardagskvöldinu og að sögn Dísu gekk það eins og í sögu. Dísa kom með dúkku fyrir Emilíu og er það fyrsta dúkkan hennar. Hún (dúkkan), er með blá augu og mikið ljóst krullað hár og Óli var ekki lengi að nefna hana Ingibjörgu, enda ekkert svo frábrugðin Ingibjörgu föðursystur Emilíu. Þetta er líklegast fyrsta dúkkan sem er nefnd eftir henni, eða hvað Ingibjörg?

Veik

2005-11-25T16:43:00.000+01:00

Við fórum með Emilíu upp á Karolínska Sjukhuset snemma í morgun eftir erfiða nótt. Hún var búin að vera með hita í næstum 3 sólarhringa, vildi ekkert drekka nema stundum vatn úr skeið og svaf óvenjumikið. Vorum farin að hafa áhyggjur af því að hún hefði fengið í eyrun, en eftir skoðun á "barnakuten" sem sýndi að eyru og háls voru í lagi þá var hún greind með svokallaða "tredagarsfeber" eða "exantema subitum" fyrir þá sem eru vel að sér í læknavísindum. Þetta er algengur barnasjúkdómur sem lýsir sér með hita í þrjá daga og roða/útslög á húð í lokin þegar hitinn lækkar. Hún fékk einmitt þennan roða á meðan við vorum á spítalanum... Við erum fegin því að vita hvað er að, hitinn er búinn að lækka og hún er öll að braggast, drakk meira að segja áðan í fyrsta skiptið síðan á þriðjudagsmorgun (fegin er ég, er komin með harðsperrur í hendurnar af brjóstapumpunni). Það var almennilegur barnalæknir sem skoðaði hana, en hjúkkan vakti samt meiri athygli, "hún" var "hann" og með skilti á barminum sem stóð á "Adam, Mr. Sister", algjör brandarakall í rauðum trúðaskóm og hinn hressasti. Við fórum frá spítalanum ánægð með hjúkku og lækni, og Emilía fékk ekkert annað en lítinn plástur á fingurinn eftir blóðprufu.

Kemst ekkert áfram...

2005-11-24T17:23:00.000+01:00

... en smá afturábak. Emilía er orðin ansi leið á því að komast ekki leiðar sinnar. Hún er fljót yfir á maga ef ég legg hana á bakið og svo hefst erfiðið. Með hendur og fætur upp í loft spriklar hún og spriklar og skilur ekkert í því að hún færist ekki úr stað. Hún er greinilega eitthvað að rugla þessu saman við sundtökin. Svo gerir hún líka margar armbeigjur, ýtir sér upp á höndunum og reynir að ýta sér eitthvert, en það gengur heldur ekkert sérstaklega vel. Hins vegar tókst henni einhvern veginn um daginn að mjaka sér út af leikteppinu og afturábak um 2 metra (sjá mynd) og hún var voðalega ánægð með sig eftir það, húrra! Við vonum að þetta fari að takast hjá henni, svo hún verði aðeins sáttari við sig.

Engin mannafæla

2005-11-22T11:11:00.000+01:00

Emilía hefur hingað til ekki sýnt neina tilburði til mannafælni. Á myndinni er hún að kynnast Reyni sem var í heimsókn hér um helgina. Við vonum að hún haldi áfram að vera svona mikil félagsvera, en maður veit vísst aldrei hvenær þessi mannafælni kemur hjá börnum og enn síður hvenær hún vex af þeim.
Litla krílið er annars farið að vera eitthvað erfitt á nóttunni, vildi bara sofa uppí hjá okkur í nótt eftir 3:ja tíma stríð við að svæfa hana aftur og aftur í rúminu og að lokum vagninum, en hún gaf sig ekki stelpan! Við verðum að vera betur undirbúin næst og fyrst og fremst útsofin. Þrekið ekkert mjög mikið kl. 2:30 að nóttu þegar maður veit að maður þarf að vakna kl. 6:30 aftur.

Veltikerling

2005-11-15T10:33:00.000+01:00

Emilía er farin að æfa sig í því að sitja, en hún er voðalega völt enn þá og getur ekki setið ein. Einstaka sinnum gleymir hún sér og situr stöðug í nokkrar sekúndur en svo sér hún eitthvað sem hún vill teygja sig eftir og þá er jafnvægið farið. Þetta krefst greinilega mikillar æfingar. Annars vill hún helst standa, finnst gaman að stíga í fæturnar og ef maður reynir að láta hana setjast þá stífnar hún oft upp eins og spýta þannig að það er ómögulegt að láta hana setjast niður. Eins er það þegar maður togar hana upp á höndunum frá liggjandi stöðu þannig að hún setjist, þá gerir hún spýtutrikkið aftur þannig að hún fer upp á fætur í staðinn fyrir bossann.

Namminamm!

2005-11-13T10:16:00.000+01:00

Emilía er farin að borða af bestu lyst. Hún er nú ekki búin að smakka á mörgu og hún hefur hingað til smjattað á öllu að undanskildri heimagerðu kartöflustöppunni minni... sem hún kúgaðist all rækilega á, greinilega ekki rétt áferð á henni og allt of seig eftir að ég var búin að hræra og stappa allt of mikið á meðan ég var að reyna að fullkomna hana. Á myndinni er hún að smakka majspure frá Semper, næst á dagskrá eru kartöflu og gulrótastappan þeirra.

Foreldragrúppa

2005-11-11T11:03:00.000+01:00

Á miðvikudaginn fórum við og hittum allar mömmurnar og börnin þeirra frá foreldragrúppunni í vor. Við fórum saman á fræðslufundi með ljósmóður okkar í lok meðgöngunnar og það var alveg svakalega góður hópur. Hef bara hitt tvær þeirra hingað til en núna ákváðum við að hittast allar með krílin og það var mjög gaman. Það urðu 2 stelpur og fjórir strákar sem fæddust í lok maj, byrjun júní, öll svakalega myndarleg :=) Á myndinni fyrir ofan eru nokkur þeirra: Emilía lengst t.v. og svo Theo, Vincent og Douglas.

Frú Barbarú og Herra Strumpur?

2005-11-08T11:46:00.000+01:00

Já, við köllum þau Emilíu og Hilmi ýmsum nöfnum, bleikt og blátt, Barbarú og Strumpur, Stor och Liten. Það síðasta á samt varla við lengur, Hilmir er að taka góðan vaxtakipp þannig að þessir 2.5 mánuðir sem munar á þeim fara að strokast út smám saman. Við Begga bíðum spenntar eftir að þau fari að taka meira eftir hvoru öðru. Það kom samt í ljós í síðustu viku að Emilíu finnst Hilmir vera með spennandi eyru og svo hafa þau hjalað við hvort annað nokkrum sinnum.

5 mánaða - fyrsti grauturinn

2005-11-06T11:14:00.000+01:00

Emilía varð 5 mánaða á föstudaginn og þá var ákveðið að hún fengi að bragða á einhverju öðru en brjóstamjólk og varð Nestle hafragrautur fyrir valinu. Það er virkilega kominn tími til þess að hún prófi eitthvað nýtt, hefur starað á eftir matnum sem fer ofan í okkur í meira en mánuð núna og er þar að auki skyndilega farin að vakna á 4 tíma fresti til að drekka á nóttunni. Hún virtist bara ánægð með grautinn og opnaði munninn í hvert skipti sem skeiðin kom fljúgandi. Hefur fengið graut tvö kvöld í röð og sefur aðeins lengur núna.

Viðburðarríkur dagur

2005-10-26T19:29:00.000+02:00

Við Emilía fórum í síðasta tímann í ungbarnanuddi í dag og hún fékk "helkroppsmassage" og líkaði það vel. Svo fórum við beint þaðan að hitta Lindu og son hennar Theo á Öppna Förskolan. Þar gerðum við afsteypu af litlu höndunum og fótunum þeirra í gifs, sungum með hinum börnunum og Emilía fékk að sitja í barnastól við borð í fyrsta skipti. Síðan kom hún mér skemmtilega á óvart með því að snúa sér frá baki yfir á maga í fyrsta skipti og Linda varð vittni af því, þannig að ég er ekkert að plata. Þar að auki tókst henni að gera eftirfarandi og geri aðrir betur: kúka í rúmið okkar, pissa á handklæðið í ungbarnanuddinu, æla á bolinn sinn, kúkaði svo tvisvar á leikteppið sitt (var að viðra bossann) og pissaði í gegnum allt í vagninum sínum!! Þvottakarfan er full núna...

Helgarferð til Sundsvall

2005-10-25T10:43:00.000+02:00

Við mæðgur skildum Óla eftir í Stockhólmi um helgina á meðan við fórum í stutta helgarferð til Sundsvall. Þar heimsóttum við Malin, Marcus og 7 mánað dóttur þeirra Sophie. Vorum samferða Önnu-Åsu og dóttur hennar Ester og svo kom Camilla með fjölskyldu frá Vasteras och Angelina og Thomas lika. Þetta var heilmikið fjör, 8 fullorðnir og 5 börn en við náðum samt að gera margt skemmtilegt. Emilía var algjör engill, kvartaði aldrei þrátt fyrir 5 tíma keyrslu fram og tilbaka, mikið af nýju fólki, nýjar svefnrútínur og stöðug læti. Þó svo að hún væri vakin um miðnætti bæði kvöldin, dúðuð og sett í bílstólinn kvartaði hún aldrei heldur horfði bara í kringum sig og sofnaði svo aftur þegar heim var komið (gistum ekki hjá Malin heldur hjá foreldrum Önnu-Åsu). Það átti enginn til orð yfir því hvað hún var mikið fyrirmyndarbarn og örugg með sig. Hér fyrir ofan er mynd af Gun, mömmu Malinar, og Kerstin, frænku hennar, að passa stelpurnar okkar þær Ester (dökkhærð), Sophie og Emilíu á meðan við fengum að baka einhvers konar hrökkbrauð eftir kúnstarinnar reglum í gömlum viðarofni.

Nenni ekki að hanga hér, vil ferðast og skemmta mér...

2005-10-19T17:02:00.000+02:00

Það er greinilegt að Emilíu líkar ekki við neina lognmollu. Það hefur reyndar verið frekar greinilegt frá því að hún fæddist, vildi alltaf láta ganga með sig svo hún gæti séð það sem var í kringum hana. Kann alltaf vel við sig innanum fólk og getur þá dundað sér ein þegar eitthvað er að gerast í kringum hana. Núna er ég líka farin að taka eftir því að ef ég er ein heima með hana, þá sættir hún sig ekki við að ég setjist með kaffibolla og Moggann, þótt hún sé úthvíld og ný búin að borða, þá fer hún strax að kvarta, og ekkert annað að gera fyrir mig enn að koma mér af rassinum og fara að vaska upp, ryksuga, eða eitthvað annað sem felur í sér hávaða og hreyfingu, að sitja fyrir framan tölvuna telst greinilega ekki til alvöru vinnu og því er það ekki samþykkt. Að rabba í síma er hins vegar leyfilegt, þótt það sé í upp undir klukkutíma :=)

Tásurnar fundnar

2005-10-16T21:32:00.000+02:00

Emilía hefur verið að virða fyrir sér tásunum sl. vikur. Fyrst tók hún helst eftir fótunum ef þeir voru í einhverjum flottum sokkum en smám saman fór hún að reyna að grípa í þá. Nú er hún komin með tæknina á hreint og nær góðu taki á táslunum hvenær sem er, en samt oft á skiptiborðinu og á leikteppinu.

Sunddrottning með marga svipi

2005-10-14T19:42:00.000+02:00

Ég fór með Emilíu í fyrsta tímann í ungbarnasundnámskeiðinu í dag og það var ofsalega gaman. Eins og mig grunaði þá var hún eins og hafmeyja í vatninu og fannst þetta voðalega spennandi. Hún var meira að segja fyrir valinu þegar sundkennarinn vildi sýna öllum hópnum hvernig við ættum að gera og hún var voðalega stollt, reyrði höfuðið upp eins og lítill selur og horfði spennt í kringum sig. Í næsta tíma á hún svo að kafa! Því miður voru engar myndir teknar í þetta sinn, en kanski Óli komi með einhvern tíman og þá verðum við að festa þetta á filmu. Hér fyrir ofan eru hins vegar nokkrar myndir teknar í gær af svipum hennar.

Að snúa sér?

2005-10-13T12:11:00.000+02:00

Þá er stóra spurningin, er Emilía farin að snúa sér eða ekki??? Það fer eftir því hvernig það skilgreinist. Já, hún snéri sér algjörlega óvart frá maga yfir á bak í síðustu viku. Varð voða hissa og svo var það ekki endurtekið aftur... Hún fór fyrir rúmum mánuði að snúa sér frá baki yfir á hlið til að teygja sig í dót eða horfa aftur fyrir sig (sjá mynd), en höndin sem er nær gólfinu er alltaf í 90 gráðu vinkli frá líkamanum þannig að hún fer aldrei alla leið yfir á maga. Við bíðum spennt eftir að hún finni út úr þessu.

4 mánaða !

2005-10-04T18:53:00.000+02:00

Emilía á 4 mánaða afmæli í dag, og okkur finnst tíminn fljúga. Sjálfri finnst mér eins og ég sé að lifa í framtíðinni, hvað gerðist? Skyndilega á maður barn og það er ekki nýfætt heldur 4 mánaða gamallt! Tók mynd af henni til að skjalfesta daginn, myndin að ofan er sem sagt splunkuný, tekin kl. 18:34 þriðjudaginn þann 4. október.

Við skiluðum vöggunni sem við fengum í láni hjá Ingibjörgu frænku á sunnudag og fengum í staðinn lánað rimlarúmið hennar Sögu. Emilía hefur núna sofið í því í tvær nætur og líkar greinilega mjög vel, því hún tók upp á því fyrstu og aðra nóttina að vakna ekkert til að drekka heldur svaf frá 21:30 til 7:00 báðar næturnar. Það má taka fram að það hefur ALDREI gerst áður en við vonum að þetta sé frekar orðin regla en undantekning :=)

"Kärt barn har många namn"

2005-09-29T18:48:00.000+02:00

... segir maður í Svíþjóð og það á aldeilis við um hana Emilíu okkar. Hún á mörg nöfn sem við notum svona til gamans þegar Emilía bara nægir ekki til að útskýra hvað okkur finnst hún mikil krúsína. Nokkur þeirra eru: Snúllhildur Snoppufríð (Óli fann upp á þessu þegar hún var bara nokkurra daga) og Tjúllhildur (þegar hún er í vondu skapi), skonsa, sætabolla, rúsína, prinsessa, krúsína, dúlla, milla og svo auðvitað gælunafnið sem bara Magnús frændi notar: beibíí eða bíbí.

Hún er ung og leikur sér...

2005-09-27T13:22:00.000+02:00

Emilía er smám saman farin að geta leikið sjálf í lengri og lengri tíma í einu. Eftir að hún fór að geta gripið í hluti og sett þá upp í sig er hún orðin miklu rólegri á teppinu sínu. Það gerðist "breik-þrú" í þessum málum þriðjudaginn þann 30. ágúst, þá var skottan 12,5 vikna gömul og hún varð mikið rólegri fyrir vikið, hafði verið að pirrast heilmikið á því að átta sig ekki á fjarlægð frá hendi til hlutar... ef þið skiljið.
Tölvumálin hjá okkur eru enn ekki alveg komin í lag og við höfum ekki náð gögnum af harðadiskinum okkar, þess vegna eru engar myndir komnar frá sumarfríinu á íslandi, við höldum samt í vonina um að ná í þetta á endanum.

Tölvan hrunin

2005-09-02T22:10:00.000+02:00

Stutt skilaboð: Tölvan heima gaf upp öndina þannig að við erum blogg og myndalaus um þessar mundir. Við búumst við að vera komin aftur í gang fljótlega.
Kveðja
Íris, Óli og Emilía Þórný

Tveimur staðalfrávikum frá meðalkúrvu

2005-08-24T22:39:00.000+02:00

Við fórum með Emilíu til Karin á BVC í gær í skoðun (11 vikna og 3 daga). Hún mældist þá 6.5kg og 64cm og fylgir hæstu kúrvu vel í þyngd, lengd og höfuðummáli. Það er því ekki skrítið að fólki finnist stelpan okkar stór eftir aldri, það er hér með staðfest.

Hilmir Viktor Stangeland

2005-08-23T23:52:00.000+02:00

Begga og Ingó eignuðust son á laugardaginn, 20. ágúst, og við fórum að heimsækja þau í "hreiðurhótelið" á Danderyd í dag. Litli strákurinn er alveg bráðmyndarlegur. Við óskum þeim hjartanlega til hamingju með soninn sem hefur fengið nafnið Hilmir Viktor. Hann var nánast nákvæmlega jafnstór og Emilía Þórný þegar hún fæddist og í dag var það því mjög sláandi hvað hún hefur vaxið mikið á bara 12 vikum.

Komin heim í heiðardalinn

2005-08-23T13:27:00.000+02:00

Emilía Þórný og Katrín Hekla

Það fyrsta sem kom upp í hugann þegar við mættum upp í Leifsstöð klukkan 06:10 í gærmorgun var að þetta væri eins og að vera í einhverri afdala flugstöð í þriðja heims ríki. Raðir út fyrir dyr, engir vagnar til undir ferðatöskurnar né barnavagninn og svo starfsfólk sem varla vissi hvað það hét..hvað þá gefið upplýsingar um hvernig við ættum að koma barnabílstól, barnavagni, tveimur blýþungum ferðatöskum, handfarangri og einu litlu barni frá bílnum og gegnum öll ósköpin. Við komumst þó yfir forláta innkaupakerru frá Fríhöfninni (guð blessi ykkur elskurnar mínar) sem vagninum var hrúgað í innpökkuðum og svo gátum við burðast með rest upp að dyrum. Við neyddumst til að skilja Emilíu eftir í bílnum í 2 mínútur á meðan við hlupum með þetta allt saman og það var ekki góð tilfinning. Þegar við komumst inn fyrir dyrnar úr rokrassinum var sem betur fer fluginu seinkað um hálftíma og hugsuðum við okkur gott til glóðarinnar með að ná smá fríhafnarstússi og að fæða ungfrúna fyrir brottför. Flugleiðir gerðu gott betur og léttu undir með okkur og frestuðu brottför í 3 tíma til viðbótar þegar 10 mínútur voru í ætlaðan brottfarartíma. Það varð síðan smá seinkun til viðbótar svo að flugvélin lagði af stað tæpum 4 tímum eftir upphaflegan brottfarartíma. Emilía tók þessu öllu mjög vel, fékk sér vænan lúr í flugstöðinni og vaknaði temmilega klukkutíma fyrir brottför og fékk sér þá sopa. Hún kunni svo afskaplega vel við sig í flugvélinni og sofnaði í flugtaki og vaknaði u.þ.b. yfir Västerås þegar 15 mín voru til lendingar.
Við komum svo loks heim í hús 12 tímum eftir að við vöknuðum á Íslandi klukkan 04:45 að morgni. Það var gott að koma heim en hálf tómlegt þó eftir að hafa verið umkringd okkar nánustu síðustu vikurnar í frábæru fríi á Íslandi.

Emilía Þórný skírð

2005-08-16T00:32:00.000+02:00

Litla dúllan okkar var skírð af séra Ólafi Jóhannessyni í Grensáskirkju í gær, skírnarvottar voru systur okkar, Sonja og Ingibjörg. Emilía stóð sig með prýði, enda búin að sofa, drekka og ropa rétt fyrir athöfnina. Hún var voðalega róleg og fylgdist vel með öllu saman okkur til mikillar gleði. Síðan var haldið upp á daginn með kaffi hjá ömmu og afa í Hvassó. Þar var fjölmenni og Emilía virtist kunna vel við sig, enda í góðum selskap! Þetta var yndislegur dagur og eftirminnilegur!

Komin í sumarfrí til Íslands

2005-07-26T13:37:00.000+02:00

Þá erum við mæðgur komnar til Íslands í frí. Flugferðin gekk eins og í sögu! Emilía var algjör engill, svaf og var bara að skoða sig um öllum til mikillar ánægju. Ég gat borðað matinn, lesið uppáhalds tímaritið mitt um þessar mundir; "Mama" og slappað af. Leið eins og hinni "fullkomnu móður", en ég held frekar að Emilía hafi verið fullkomin þessar klukkustundir (eins og auðvitað alltaf). Emilía hefur núna fengið að hitta bæði ömmur og afa og langömmur og er alsæl, saknar samt pabba síns en hann kemur á laugardag! Meiri fréttir frá klakanum (sem er reyndar alveg að bráðna í sólskininu) koma síðar.

Spennandi önd og annað dót

2005-07-22T11:02:00.000+02:00

Emilía fór í byrjun síðustu viku (þá orðin rétt rúmlega 5 vikna) skyndilega að taka eftir litlu öndinni sem hangir í vagninum hennar og núna getur hún horft á hana dinglast og danglast fram og tilbaka endalaust ef vel liggur á henni. Kemur sér vel í göngutúrum þegar hún vaknar (arrg, á náttúrulega helst að sofa). Þá er hún yfirleitt sátt við að liggja áfram í vagninum og fylgjast með öndinni sinni. Ingibjörg og Örvar komu svo með fína og litríka tréfíguru með bjöllum á sem hún fær líka að horfa á og hefur gaman af.

Magnús frændi í heimsókn

2005-07-17T16:32:00.000+02:00

Þau Ingibjörg, Örvar og Magnús frændi eru í helgarheimsókn núna og fá allir að prófa að halda á Emilíu og gjarnan að skipta á henni líka :=). Magnús hefur verið agalega góður við litlu frænku sína og klappar henni varlega og segir "aaaahh". Hann á dálítið erfitt með að segja Emilía og kallar hana þess vegna "beibíí", enda er það náttúrulega vel við hæfi. Við fórum í picknick á ströndinni í dag og Magnús óð galvaskur út í svalt vattnið og synti og buslaði á fullu. Ætli Emilía baði nokkuð þar til næsta sumar og þá kanski hún verði jafnhrifin og Magnús.

Frænkur í heimsókn

2005-07-15T22:35:00.000+02:00

Frænkur mínar Ingrid og Anna komu að heimsækja Emilíu Þórnýju í dag og hún hafði það gott í fanginu hjá þeim. Svaf heillengi hjá Ingridi og kúrði hjá Önnu. Það er svo gott að fá að sofa í fanginu hjá einhverjum og kúra. Sú stutta er mikið fyrir "power naps" upp á 10-20 min. og vaknar svo um leið og hún er lögð í vagninn eða vögguna.

Fín í sumarkjól

2005-07-11T17:34:00.000+02:00

Við klæddum Emilíu Þórnýju í sparikjól sl. föstudag þegar við fórum út að borða á Lidingö Värdshus. Mér leið eins og í dúkkuleik, enda er þetta algjör dúkkukjóll sem hún fékk frá ömmu og afa. Þess má geta að hann er keyptur í Zöru þar sem stærðirnar miðast við lítil og mjó spænsk ungabörn, þessi kjóll er í stærð 66-74 og á að passa á 6-9 mánaða gömul börn...

Í 5 vikna skoðun á BVC

2005-07-11T08:26:00.000+02:00

Ég fór með Emilíu Þórnýju í 5 vikna skoðun til Karin á BVC (Barnavardscentralen) á fimmtudaginn og þá mældist skvísan 5.1kg og 60cm. Þó svo að ég sé með henni alla daga þá sé ég að hún vex, svona hratt stækkar hún! Hér er mynd af henni á skiptiborðinu þar sem Karin er að athuga hvort hún fylgi með augunum, og auðvitað gerði hún það, enda vill hún alltaf vera að fylgjast með og helst ekki loka augunum til að sofa.

Sætasta brosið

2005-07-06T21:18:00.000+02:00

Loksins náðist almennileg mynd af Emilíu Þórnýju brosandi. Fyrsta skiptið sem hún brosti var á fjórða degi þegar hún var að drekka og það kom mjólk. Þá færðust munnvikin uppávið og við bráðnuðum náttúrulega. Núna varir brosið aðeins lengur og nær til augnanna. Henni finnst skemmtilegast þegar einhver er að tala við hana og þá brosir hún gjarnan og hjalar tilbaka.

Mánaðargömul pabbastelpa

2005-07-05T12:01:00.000+02:00

Emilía Þórný varð mánaðargömul í gær, ótrúlega líður tíminn hratt! Hún hefur verið dálítið óróleg í maganum og sefur stundum voðalega lítið, því hún finnur ekki ró, eða vaknar eftir 10 mín með gráti. Og svo á endanum er hún orðin svo þreytt að hún grætur af þreytu, greyið litla, við finnum ægilega til með henni. Það er líka frekar heitt hérna og mikil sól og það gerir hana kanski óværari líka. Við mæðgur ætlum því að halda okkur innandyra heitasta tíma dagsins í dag og fara bara í kvöldgöngu í kvöld.
Hún er líka orðin mikil pabbastelpa og sofnar helst í fanginu hjá honum, held að hún finni bara mjólkurlykt af mér og vill þá stöðugt drekka, þótt hún sé ekkert svöng.

Amma og afi í heimsókn

2005-06-26T18:39:00.000+02:00

Amma Soffía og afi Baldur eru núna í heimsókn og Emilía Þórný nýtur þess (og foreldrarnir ekki síður, lúxus að fá hjálp við bleyjuskipti, uppvask og bara að komast í sturtu án þess að hafa áhyggjur af því að Emilía sé vöknuð eða ein að gráta). Óli fór í vinnuna sama dag og þau komu þannig að ég hef haft frábæran félagsskap heima og fengið smá reynslu í að fara með hana út. Emilía hefur farið niður í bæ, setið á kaffihúsi, farið í heilsdagsveislu á Midsommar og skroppið í dagsferð til Västerås og allt saman hefur gengið mjög vel. Það er helst ég sem er stressuð stundum en litla bara sefur á sínu græna í vagninum og lætur fátt trufla sig.
/Iris

Midsommar stelpa

2005-06-26T18:23:00.000+02:00

Emilía Þórný fór á midsommarskemmtun á föstudaginn og skemmti sér vel. Hún gat nú ekki dansað í kringum midsommarstöngina í þetta sinn, en Baldur afi týndi blóm og amma Soffía hnýtti lítinn blómakrans handa henni í tilefni dagsins.

Hæ, hó jippí jej og jippíi jej!

2005-06-18T20:09:00.000+02:00

Emilía fór í fyrsta partýið sitt í gærkvöldi, 17. júní grill hjá Beggu og Ingó. Hún kunni bara vel við sig og fékk góðar móttökur. Á myndinni eru þær Begga og Ragga að dást að henni.

Hér er búinn að vera sumarhiti og Emilía virðist ekki þola hann vel, hlakkar til að koma til Íslands í svalann sumarblæinn. Sem betur fer var aðeins svalara í dag og við ákváðum að eyða deginum í pick-nick í svölum skugganum við tjarnirnar hérna rétt hjá, það féll í kramið hjá dúllunni og hún hefur sofið sem aldrei fyrr, tók þrjá tveggja tíma lúra í röð, stelpan kann greinilega vel við sig utandyra.

Nú eru líka komnar nýjar myndir af Emilíu Þórnýju

Heitt í dag, rigning á morgun?

2005-06-16T22:36:00.000+02:00

Í dag var 25 stiga hiti og sól og við vorum því bara innan dyra í dag. Samt var Emilía ansi pirruð á hitanum og svaf lítið í dag. Hún er eins og hann pabbi hennar og líður best í íslenska loftslaginu þar sem hitinn er milli 0 og 10 gráða. Við fórum því bara í kvöldgöngu þegar hitinn var kominn niður fyrir 20 gráður og stoppuðum í 7-11 og fengum okkur ís, þ.e.a.s við Íris. Emilía mun fá þennan ís einhvern tímann á morgun eftir smá vinnslu hjá Írisi :) Á morgun á ekki að vera jafn heitt og í dag og vonumst við eftir "þjóðhátíðarveðri" og aðeins betri líðan hjá dömunni.
Begga og Ingó verða með 17. júní grill heima hjá sér á morgun og ætlum við að mæta þangað öll og verður það því fyrsta útstáelsið hjá Emilíu Þórnýju. Það verður gaman að komast aðeins út og sjá aðeins meira af heiminum.
Um helgina verður síðan myndasíðan uppfærð með nýjum, ferskum myndum.

Drekkur, drekkur....

2005-06-15T17:43:00.000+02:00

Hún Emilía Þórný fór í skoðun á BVC (Barnavårds Centralen) á mánudaginn 13/6 og reyndist þá vera búin að bæta á sig 1/2 kg á einni viku. Hún er því komin yfir fæðingarþyngdina og orðin 3.8 kg stúlkan. Við erum reyndar ekkert hissa á þessari þyngdaraukningu þar sem að hún er ansi iðin við að næra sig. Það er þó ekki mikið m.v. frænda hennar, son Rakelar og Jóa, sem að fæddist í morgun 15/6 í Kaupmannahöfn en hann var 5 kg og 57 cm við fæðingu.
Við höfum einnig verið að rýna í háralitinn hjá henni og erum orðin nokkuð sannfærð um að hún sé rauðhærð eftir að hafa í fyrstu haldið að hún væri ljóshærð. Ætli það sé ekki einhversstaðar mitt á milli, nokkurs konar "Strawberry Blonde"? Hvað finnst ykkur annars?

1 viku afmæli

2005-06-12T17:43:00.000+02:00

Í gær var Emilía 1 viku gömul og Begga og Ingó voru svo sniðug að koma með ekta sænska "prinsesstårta" handa prinsessunni í tilefni dagsins.
Hún var annars svo upprifin yfir heimsókninni að hún sofnaði ekki fyrr en klukkan hálf átta um kvöldið og hafði þá verið vakandi frá því um eittleitið fyrir utan einhverja beuty-blunda í fanginu á mér og Óla yfir daginn. Henni var líka greinilega ægilega illt í maganum um kvöldið og mikið er það sárt að sjá hana þjást. Hélt svo fyrir okkur vöku í nótt. Könnumst ekki alveg við það að nýburar sofi svo mikið... hún er voðalega hrifin af því að vera vakandi og sérstaklega fyrripart nætur, svo er hún frekar róleg fram til hádegis. Sem sagt nátthrafn.

Kveðja frá nýbakaðri mömmu

2005-06-08T20:56:00.000+02:00

Þá erum við þrjú komin heim í hreiðrið okkar. Fórum heim í fyrradag og hún svaf vært í bílnum á leiðinni þrátt fyrir taugastyrka foreldra sem keyrðu á 30 heim frá spítalanum og hefðu helst viljað fá lögreglufylgd heim til að koma í veg fyrir möguleg slys.

Það var sannarlega gaman að koma heim og lesa allar hlýju kveðjurnar á blogginu okkar, þökkum hjartanlega fyrir falleg orð og hugsanir!

Það er allt á hvolfi hér og greinilegt að Emilía ræður ferðinni, við vitum varla hvort það sé dagur eða nótt en vonum að hún verði aðeins reglulegri eftir nokkra daga í viðbót. Okkur finnst hún náttúrulega vera fallegasta barn í heimi og dáumst að henni og svipbrigðum og geiflum hverja mínútu. Hún er lítil og róleg stelpa sem finnst best að fá að drekka eða kúra í faðminum hjá mömmu eða pabba. Er lítið hrifin af því að sofa ein en við reynum samt að leggja hana í vögguna sína þegar hún sefur svo hún venjist því líka.

Emilía Þórný Ólafsdóttir

2005-06-05T17:51:00.000+02:00

Hæ hæ

Emilía Þórný kom í heiminn laugardaginn 4. júní 2005 klukkan 20:27 að sænskum tíma.

Öllum heilsast vel og við erum í sjöunda himni
Kveðja
Íris, Óli og Emilía

Laugardagur til lukku !

2005-06-03T10:29:00.000+02:00

Vorum á Karolínska í skoðun og allt leit vel út. "da baby" var í fullu fjöri og virðist bara líða vel, en við ákváðum að taka örlögin í okkar hendur og fengum það í gegn að vera sett af stað á morgun, laugardaginn 4. júní. Þetta getur nú tekið dálítinn tíma þannig að öllum líkindum verður krílið komið í heiminn á sunnudag. Í dag og í kvöld höfum við því tíma til þess að slaka á (alla vega Íris), skipuleggja hvað við tökum með okkur á fæðingardeildina, hlaða batterí fyrir myndavélar, gemsa og videó og undirbúa okkur andlega (ef það er hægt).
Meiri fréttir koma síðar
Over and out

41 vika og 6 dagar...

2005-06-02T16:25:00.000+02:00

Barnið virðist ekkert á því að koma í heiminn. Skiljum ekki í því að það nenni að klessast þarna í maganum, því það er ekki eins og plássið sé að aukast. Mér fannst krílið vera eitthvað rólegt á þriðjudaginn og fékk því að koma upp á Karolínska í smá tjekk. Þar var ég sett í hjartarita í 50min og fylgst með samdráttum. Það sást þá að ég var með reglulega samdrætti, en þeir eru nú ekki sterkir. Barnið var í fullu fjöri á meðan að á þessu stóð, hef ekki séð það hreyfa sig svona mikið í lengri tíma, er það ekki týpískt! Læknirinn sagði að ég væri komin með 2cm í útvíkkun þannig að eitthvað er nú líkaminn að undirbúa sig og svo var hreyft við belgnum í von um að eitthvað færi af stað. Var svo andvaka alla nóttina úr því að ég var svo spennt að bíða eftir að verkirnir myndi aukast... en þeir duttu niður um morguninn eins og alla aðra morgna... og Óli fór í vinnuna, enn einn daginn, eftir að hafa spurt hvort ég héldi að það væri eitthvað að gerast.
Á morgun kl. 8:00 (hef ekki vaknað svo snemma í 3 vikur) eigum við svo tíma í "överburenhetskontroll" á Karolínska. Þá verður aftur fylgst með hjartslætti, samdráttum, farið í sónar, athugað hvort blóðflæði í naflastrengnum sé nógu gott, tjekkað á útvíkkun og hreyft við belgnum... væri ekki bara minna mál að setja mig af stað?? Við óþolinmóðu foreldrarnir erum farin að hlakka ægilega til þess að hitta þennan þolinmóða einstakling!
"Moster" og bráðum Dr. Sonja bað um bumbumyndir, hér eru þær:

41 vika og 5 dagar. Komin með fína "hyllu".

Pabbinn heilsar

2005-05-30T21:26:00.000+02:00

Halló halló gott fólk !!!

Nú er ekkert að gerast hjá okkur og því sannarlega tilefni til að blogga aðeins og flytja smá "ekki-fréttir". Ég var mikið búinn að pæla í þeirri kennitölu sem að barnið myndi fá því að maí mánuður 2005 er svo sannarlega gósenmánuður fyrir svona tölunörda eins og mig.
050505, bæði á Íslandi og í Svíþjóð
050515 eða 150505
050520 eða 200505
050525 eða 250505
050530 eða 300505
Það er ótrúlegt að barnið skuli ekki hafa hitt á eitthvað af þessum tölum :-) Ég er núna að biðja Írisi um að stefna frekar á 7. júní fyrir 050607 (070605) en undirtektir eru eitthvað dræmar.
Annars höfum við nú verið að spá í meðgöngulengd í ættunum okkar og það virðist ekkert vera óalgengt að börn gangi yfir tímann, alla vega Írisar megin. Þetta er því ekkert óeðlilegt ef tekið er tillit til þessa. Þetta er nú ekki alslæmt því að börn sem ganga yfir tímann eru einstaklega gáfuð börn, alla vega samkvæmt konunni sem vinnur í miðasölunni á lestarstöðinni hérna niðrí Centrum. Einnig fæddist víst stórleikarinn Jackie Chan eftir 10 mánuði meðgöngu þ.a. þetta verður greinlega ofurgáfuð kvikmyndstjarna.
Það var ekki meira í ekki-fréttum að þessu sinni.
Bæjó frá Sundbyberg
Óli

Góðir hlutir gerast hægt...

2005-05-27T13:40:00.000+02:00

... sagði einhver, eða var það ekki þannig? Það er alla vega á hreinu að krílið er ekkert að flýta sér í heiminn, verður orðið að rúsínu þegar það loksins kemur út eftir 42, 43(?) vikna sund í maganum.
Í dag er meðgangan orðin 41 vika og ég fór í tilefni dagsins til Gunillu ljósmóður til að tjekka á kúlunni. Blóðþrýstingurinn náði núna sögulegu lágmarki (105/50) og allt bara í stakasta lagi. Barnið er núna skorðað (one small step...), alltaf eitthvað til að gleðjast yfir:=)
Fór að spyrjast fyrir um hvert framhaldið yrði ef barnið lætur bíða enn lengur eftir sér og það er greinilegt að Svíar eru fyrir náttúrulega fæðingu og ekki gangsettningu. Þegar ég verð komin 2 vikur framyfir fer ég í skoðun á Karolinska þar sem fósturstærð og legvatn o.fl. verður metið og mælt. Ef allt er í lagi verður ekkert gert heldur þessi skoðun endurtekin á 2ja daga fresti þar til ég er gengin 3 vikur (!!) framyfir og þá er fæðingin loksins sett af stað, þ.e. ef þetta kemur ekki af sjálfu sér. Sem sagt er síðasti sjens á að barnið fæðist u.þ.b. 11. júní, spurning hvort maður biðji ekki bara um viku í viðbót og panti svo keisara 17. júní, til að gera þetta nú með stæl úr því að það er verið að bíða svona lengi á annað borð.

+ 5 dagar og ekkert að gerast...

2005-05-25T16:25:00.000+02:00

"Komdu út", biðjum við Óli, en krílið virðist ekkert vera á þeim buxunum, þótt það sé orðið heldur þröngt í maganum. Mér finnst barnið hafa tekið einhvern vaxtakipp síðustu daga og það er greinilegt að barn af þessari stærð hefur ekkert að gera í maganum degi lengur. Það er orðið ótrúlega sterkt og spyrnir sér með fótunum og þrýstir upp bossanum, boxar með höndunum og teygir sig (og mig!) í allar áttir.
Fer í langa göngutúra og geng í tröppum til að koma þessu af stað en allt kemur fyrir ekki. Var á röltinu í 5 klst í bænum í dag og gerði allt sem maður óskar sér að maður gæti gert þegar maður er fastur í vinnunni á fínum sumardegi: fékk mér hádegismat með Beggu, settist niður á kaffihús og drakk kaffi latte og las bók, verslaði smá og skoðaði í búðarglugga. Er búin að pakka niður dótinu sem við tökum með okkur á fæðingardeildina þannig að við erum tilbúin að rjúka út um leið og fæðingin (sem á náttúrulega eftir að vera hröð og taka fljótt af) fer af stað. Hef aldrei hlakkað til þess að fá verki, en núna magnast eftirvæntingin með hverjum deginum sem líður...

Hvenær kemur krílið og hvað er það stórt?

2005-05-22T20:48:00.000+02:00

Erum farin að spyrja okkur þessara spurninga ansi oft núna. Þið megið gjarnan koma með ágiskun á fæðingardag, þyngd og lengd. Það er allt með kyrrum kjörum hér en ég giska á að það komi 26. maí og verði þá 3700gr og 54cm. Óli hélt 22. maí en það er orðið mjög ólíklegt...

19. maj = 40 vikur komnar ...

2005-05-19T14:24:00.000+02:00

Þá kom að því að það stæði 19. maj í dagatalinu, og eins og mig grunaði þá er hann ekkert ólíkur öllum hinum dögunum. Klukkan að verða þrjú og ekkert bólar á baby-inu og engir verkir að láta á sér kræla heldur. Það er greinilegt að ég fæ að horfa á undankeppni Eurovision ótrufluð og kanski líka aðalkeppnina á laugardag, yes! Óla hefur dreymt að krílið komi 22. maj og mér líst bara vel á þá dagsetningu.

Fór til Gunillu ljósmóður á þriðjudag og samkvæmt henni sneri höfuðið niður í grindina en var ekki alveg skorðað heldur pínu "rukkbart" eða hreyfanlegt eins og það heitir á íslensku. Þetta þýðir sem sagt að það á eftir að síga aðeins meira, til að teljast full skorðað. Annars var allt með felldu, blóðsykur og blóðþrýstingur lágur og maginn akkúrat á meðalkúrvunni.

Á mynd: 39 vikur 3 dagar, tikkandi sprengja...

38 vikur og stóri dagurinn nálgast

2005-05-05T21:37:00.000+02:00

Nú er foreldrafræðslunni lokið á MVC (Mödravårds Centralen) og við erum orðnir útlærðir foreldrar. Á MVC fengum við að sjá heimildamyndir um fæðingar og brjóstagjafir (the epic movie "Bröst är bäst") sem og allar hugsanlegar verkjastillandi aðferðir s.s. nálastungur voru kynntar og ræddar. Við erum einnig búin að versla fyrir hálf fjárlög íslenska ríkisins í Babyland (http://www.babyland.se/) og eigum allar græjur sem svona kríli þurfa nauðsynlega að fá. Hverjum hefði dottið í hug að það væri til svona mikið af barnagræjum? Það eru greinilega snillingar að verki sem að finna upp á öllu þessu dóti sem að maður getur hreinlega ekki verið án. Það er ómögulegt að ímynda sér hvernig foreldrar okkar fóru að þegar ekki voru til rafmagns brjóstapumpur og þvottabalar með hitamælum og sæti. Við erum annars á leiðinni út úr bænum í rómantíska herragarðsheimsókn á morgun þar sem ætlunin er að njóta síðustu daganna áður en krílið lætur sjá sig. Það verður víst ekki mikið um svoleiðis ferðir á næstunni og því um að gera að nota tækifærið :-)

35 vikur og 2460gr

2005-04-17T20:48:00.000+02:00

Við létum eftir okkur að fara í auka sónar á föstudag. Við fengum allan sónarinn á myndbandi með okkur heim og þar að auki nokkrar ljósmyndir af yndinu. Við gátum séð hluta af andlitinu og það lítur út fyrir að krílið erfi þykkar varir Óla og ekki varaleysið mitt. Samkvæmt ljósmóðurinni var allt eins og það á að vera og barnið mældist 2460gr, eða 5% undir "meðalbarni" í viku 35 sem fæðist 3500gr eftir 40 vikna meðgöngu. Það virðist því sem martraðir mínar um risabarn eigi sér enga stoð í raunveruleikanum og ég get því farið að slaka á.